Курултайда Жылдызкан Жолдошева сүйлөгөндө зал уу-дууга түштү

25-ноябрда Бишкек шаарында биринчи элдик курултай өтүп жатат. Ага президент Садыр Жапаров да катышууда.

Жыйында саясатчы Жылдызкан Жолдошева делегат катары сөз сүйлөдү. Ал Кыргызстанга президенттик башкаруунун кереги жок экенин айтты.

«Башынан кандай кыйынчылык өтсө дагы, кимиси болбосун, президенттик тактыга жеткенде «монстрга» айланат экен. Ошол үчүн биз президенттик-парламенттик башкарууга өтүшүбүз зарыл», - деди Жолдошева.

Ошол учурда зал уу-дууга түштү. Курултайдын төрагасы залды тынч болууга чакырды.

Жолдошева курултайда ар ким өз оюн айтууга укуктуу экенин белгиледи.

«Менин сөзүмдү бөлбөгүлө.

Бул маселеге кайтып келиш керек, Садыр Нуркожоевич. Анткени сизден кийин кандай адам келет? Өлкөнү каякка алып барат?...», - деди Жолдошева.

Ошондой эле ал Камбар-Ата-1 ГЭСи тууралуу сөз кылды.

«Акылбек Үсөнбекович, ушул жерде ГЭСти балким кошуна өлкөлөр менен курабыз деп сүйлөп кеттиңиз. Сиз кайсы бийлик менен гана иштеген жоксуз, канча президентти кетирдиңиз...», - деген Жолдошева Министрлер кабинетинин төрагасы Акылбек Жапаровго кайрылды.

Бул учурда залда кол чабуулар болду.

«Камбар-Ата-1 — суунун, ГЭСтердин башы. Кайсы өлкө менен салам деп жатасыңар? Өзбекстан мененби, башка мененби, анда бизди эгемендүү өлкөдөн ажыратып коесуңар. Биздин алтын да кымбат нерсебиз — суу, энергетика. Ошондуктан бул оюңардан кайткыла.

Анан коррупция менен күрөшүп жатасыңар, Садыр Нуркожоевич. Энергетика министри — 20 миллиондон ашык зыян келтирген адам министр болуп отурат. Коррупция менен күрөшсөңөр депутаттарды коркутпай, өзүңүздүн командадан баштаңыз, Садыр Нуркожоевич. Аларды "крышевать" этпеңиз.

Сиз президенттикке бара жатканда экөөбүз Ош шаарынын стадионунда бүтүндөй улуу арбактардын алдында кандай убадаларды бердик эле? Ошону аткарыңыз. Кээ бирлерин аткарып жатасыз, тескери болуп жатат.

Ошондо мен сизден сурандым эле, Кара-Сууда Мады, Отуз-Адыр айыл өкмөттөрүнөн жер бөлүп бергенбиз. Аэропортту которуш керек. Себеби 5 мүнөт Өзбекстандын аймагында учуп, анан конобуз. Көрдүк ээ, миңдеген жылдар бою кошуна болгон өлкөлөр кандай мамиле жасап жатканын», - деди Жолдошева.

Курултайдын төрагасы сөздү жыйынтыктоого чакырды. Ошол учурда зал кайрадан уу-дууга түштү.

«Бири-бирибизге сый мамиле жасайлы деп айтып жатасыңар. Кана сый? Кошоматчылар жоголмоюн өнүгүү болбойт», - деди Ж.Жолдошева.

[ Официальный канал ИА АКИpress ]
Смотрите и читайте нас:
Наш сайт: www.akipress.org
Instagram: instagram.com/akipress
Страница в Facebook: facebook.com/akipress
Twitter: twitter.com/akipress
Телеграм: t.me/akipress
TikTok: tiktok.com/@akipresskg