Zoxe d be Baššo – U Sayfo w u lišono di emo ܙܳܟ݂ܶܐ ܕܒܶܐ ܒܰܫܫܐ : ܐܘ ܣܰܝܦܐ ܘܐܘ ܠܝܫܳܢܐ ܕܝ ܐܶܡܐ
Автор: Zmirotho Suryoyotho
Загружено: 2020-06-14
Просмотров: 869
#Sayfo1915
Lyrics: Zoxe d be Baššo
Music: Elias Bachoura
Inaqla d nošo mšayal mini cal u Sayfo,
lo koḏacno mën omarno.
I iḏactayḏi noquṣto yo bu mënyono daq qṭile
aw ban ëšmone daq qaṭole
dë nḥirënne dlo raḥme.
Cal i iqarṯayḏi, kibi d maḥkeno,
u mede d komaḥke babi cal u jëddo,
dë tlewayle silaḥ taḥt i gumṯo.
Ya ste u mede d maḥkewa qašši cal u babo,
d axile bosire bu darbo d Ciwardo.
Elo, l tašciṯo d camo,
nësyono d babo w jëddo lo komakfelan yo…
Kul tašciṯo d maṭilan yo,
u ḥa d lo qṭil maslamlelan yo.
Mëqqa d koraxno w lo koraxno,
l tašciṯo d suhḏo qṭilo dlo suhḏo lëg moṭeno.
Mëqqa msakër mu camano,
w lo fayëšlan mine xabro?
Elo u qaṭlano,
latwa bas qaṭlo faġronoyo d camo.
Abici d quṭli u lišono w i marduṯo,
cam gabe du faġro bësronoyo.
Bu tuqiḏo dak kṯowe dan abohoṯo,
fayišo i marduṯo catëqto noquṣto.
Bu qaṭlo d gawre w niše dlo mënyono,
ṭralle i marduṯo yawmayto cam lišono mḥilo.
U lišono d kul yawmo, u lišono di emo,
fayëš dlo sëfroyuṯo.
Elo hul l udco saġ yo !
Qṭilina, nḥirina w mbarbëzina, šrolo yo !
Elo i mëštaylonuṯo du quyomo,
du lišono w di marduṯo,
addawro cal katfayna yo!
Mu ṭacno du lišono dan abohoṯo,
komamiṯina u lišono di emo.
Kṯobonoyo w Ṭuroyo,
aḥunone dë ḥḏo iqarṯo Suryayto Oromayto.
Kul ḥa d koḥošaw ruḥe mu camano,
ṭro yolaf u lišono di emo,
w koṯaw ebe kṯowo, mimarṯo aw mimro.
Yawmo d misakër u lišono Oromoyo,
d nošo lëzze omër:
“U camo Suryoyo lawile moro!”
ܐܝܢܰܩܠܰܐ ܕܢܳܫܐ ܡܫܰܝܰܠ ܡܝܢܝ ܥܰܠ ܐܘ ܣܰܝܦܐ܆
ܠܐ ܟܳܐܕ݂ܰܥܢܐ ܡܷܢ ܐܳܡܰܪܢܐ.
ܐܝ ܐܝܕ݂ܰܥܬܰܝܕ݂ܝ ܢܳܩܘܨܬܐ ܝܐ ܒܘ ܡܷܢܝܳܢܐ ܕܰܩ ܩܛܝܠܶܐ
ܐܰܘ ܒܰܢ ܐܷܫܡܳܢܶܐ ܕܰܩ ܩܰܛܳܠܶܐ
ܕܷܢܚـܝܪܷܢܢܶܗ ܕܠܐ ܪܰܚܡܶܐ.
ܥܰܠ ܐܝ ܐܝܩܰܪܬ݂ܰܝܕ݂ܝ، ܟܝܒܝ ܕܡܰܚܟܶܢܐ
ܐܘ ܡܶܕܶܐ ܕܟܳܡܰܚܟܶܐ ܒܰܒܝ ܥܰܠ ܐܘ ܔܷܕܕܐ
ܕܷܬܠܶܘܰܝܠܶܗ ܣܝܠܰܐܚ ܬܰܚܬ ܐܝ ܓܘܡܬ݂ܐ.
ܝܰܐ ܣܬܶܐ ܐܘ ܡܶܕܶܐ ܕܡܰܚܟܶܘܰܐ ܩܰܫܫܝ ܥܰܠ ܐܘ ܒܰܒܐ܆
ܕܐܰܟ݂ܝܠܶܗ ܒܳܣܝܪܶܐ ܒܘ ܕܰܪܒܐ ܕܥܝܘܰܪܕܐ.
ܐܶܠܐ، ܠܬܰܫܥܝܬ݂ܐ ܕܥܰܡܐ
ܢܷܣܝܳܢܐ ܕܒܰܒܐ ܘܔܷܕܕܐ ܠܐ ܟܳܡܰܟܦܶܠܰܢ ܝܐ...
ܟܘܠ ܬܰܫܥܝܬ݂ܐ ܕܡܰܛܝܠܰܢ ܝܐ،
ܐܘ ܚܰܐ ܕܠܐ ܩܛܝܠ ܡܰܣܠܰܡܠܶܠܰܢ ܝܐ.
ܡܷܩܩܰܐ ܕܟܳܪܰܟ݂ܢܐ ܘܠܐ ܟܳܪܰܟ݂ܢܐ܆
ܠܬܰܫܥܝܬ݂ܐ ܕܣܘܗܕ݂ܐ ܩܛܝܠܐ ܕܠܐ ܣܘܗܕ݂ܐ ܠܷܓ ܡܳܛܶܢܐ.
ܡܷܩܩܰܐ ܡܣܰܟܷܪ ܡܘ ܥܰܡܰܢܐ܆
ܘܠܐ ܦܰܝܷܫܠܰܢ ܡܝܢܶܗ ܟ݂ܰܒܪܐ؟
ܐܶܠܐ ܐܘ ܩܰܛܠܰܢܐ،
ܠܰܬܘܰܐ ܒܰܣ ܩܰܛܠܐ ܦܰܓ݂ܪܳܢܝܐ ܕܥܰܡܐ.
ܐܰܒܝܥܝ ܕܩܘܛܠܝ ܐܘ ܠܝܫܳܢܐ ܘܐܝ ܡܰܪܕܘܬ݂ܐ܆
ܥܰܡ ܓܰܒܶܗ ܕܘ ܦܰܓ݂ܪܐ ܒܷܣܪܳܢܳܝܐ.
ܒܘ ܬܘܩܝܕ݂ܐ ܕܰܟ ܟܬ݂ܳܘܶܐ ܕܰܢ ܐܰܒܳܗܳܬ݂ܐ܆
ܦܰܝـܝܫܐ ܐܝ ܡܰܪܕܘܬ݂ܐ ܥܰܬܷܩܬܐ ܢܳܩܘܨܬܐ.
ܒܘ ܩܰܛܠܐ ܕܓܰܘܪܶܐ ܘܢܝܫܶܐ ܕܠܐ ܡܷܢܝܳܢܐ܆
ܛܪܰܠܠܶܗ ܐܝ ܡܰܪܕܘܬ݂ܐ ܝܰܘܡܰܝܬܐ ܥܰܡ ܠܝܫܳܢܐ ܡܚܝܠܐ.
ܐܘ ܠܝܫܳܢܐ ܕܟܘܠ ܝܰܘܡܐ، ܐܘ ܠܝܫܳܢܐ ܕܝ ܐܶܡܐ܆
ܦܰܝܷܫ ܕܠܐ ܣܷܦܪܳܝܘܬ݂ܐ.
ܐܶܠܐ ܗܘܠ ܠܐܘܥܕܐ ܣܰܐܓ݂ ܝܐ!
ܩܛܝܠܝܢܰܐ، ܢܚـܝܪܝܢܰܐ ܘܡܒܰܪܒܷܙܝܢܰܐ، ܫܪܳܠܐ ܝܐ!
ܐܶܠܐ ܐܝ ܡܷܫܬܰܝܠܳܢܘܬ݂ܐ ܕܘ ܩܘܝܳܡܐ
ܕܘ ܠܝܫܳܢܐ ܘܕܝ ܡܰܪܕܘܬ݂ܐ
ܐܰܕܕܰܘܪܐ ܥܰܠ ܟܰܬܦܰܝܢܰܐ ܝܐ!
ܡܘ ܛܰܥܢܐ ܕܘ ܠܝܫܳܢܐ ܕܰܢ ܐܰܒܳܗܳܬ݂ܐ܆
ܟܳܡܰܡܝܬ݂ܝܢܰܐ ܐܘ ܠܝܫܳܢܐ ܕܝ ܐܶܡܐ.
ܟܬ݂ܳܒܳܢܳܝܐ ܘܛܘܪܳܝܐ،
ܐܰܚܘܢܳܢܶܐ ܕܷܚܕ݂ܐ ܐܝܩܰܪܬ݂ܐ ܣܘܪܝܰـܝܬܐ ܐܳܪܳܡܰܝܬܐ.
ܟܘܠ ܚܰܐ ܕܟܳܚܳܫܰܘ ܪܘܚܶܗ ܡܘ ܥܰܡܰܢܐ܆
ܛܪܐ ܝܳܠܰܦ ܐܘ ܠܝܫܳܢܐ ܕܝ ܐܶܡܐ܆
ܘܟܳܬ݂ܰܘ ܐܶܒܶܗ ܟܬ݂ܳܘܐ، ܡܝܡܰܪܬ݂ܐ ܐܰܘ ܡܝܡܪܐ.
ܝܰܘܡܐ ܕܡܝܣܰܟܷܪ ܐܘ ܠܝܫܳܢܐ ܐܳܪܳܡܳܝܐ܆
ܕܢܳܫܐ ܠܷܐܙܙܶܗ ܐܳܡܷܪ:
”ܐܘ ܥܰܡܐ ܣܘܪܝܳـܝܐ ܠܰܘܝܠܶܗ ܡܳܪܐ!“
For more songs, subscribe and go to :
http://zmirothosuryoyotho.weebly.com/
FACEBOOK PAGE : / zmirothosuryoyotho
Доступные форматы для скачивания:
Скачать видео mp4
-
Информация по загрузке: