Ezizgeldi Helleňow Eý, Alla!

Eý, Alla!
Mähribanlarym bilen Umra
zyýaratymyzy ýerine ýetirenimizde dörän setirler

Çakylygyň alyp, geldim men Umra,
Aňsatlaşdyr, ony maňa, eý, Alla!
Sen barada zikirlere men gümra,
Durkum, kalbym gurban saňa, eý, Alla!

Ilki niýet edip ihrama girdim,
Niýetimi sen eşitgil, eý, Alla!
Telbiýe aýdyp men, Käbähe geldim,
Joşan kalbym sen köşetgil, eý, Alla!

Käbedäki jaýyň sylyp ýüzüme,
Oň daşynda etdim togap, eý Alla!
Begenç, guwanç ýaşy indi gözüme,
Ol keremli daşy ogşap, eý, Alla!

Ne gündizi duýdum ne-de gijäni,
Kuwwat berdiň bu bedene, eý, Alla!
Ne suwsatdyň, ne isletdiň iýmäni,
Batlar goşduň sen gadama, eý Alla!

Zemzem suwuň dermän bu şirin jana,
Naçe içsem şonçada az, eý, Alla!
Saý etdim ýöreýip, men iki ýana,
Safa, Merwe daglaryň uz, eý, Alla!

Azan sesin – guşlar dymyp diňleýär,
Ol owaz Älemde taýsyz, eý, Alla!
Gamly, gamsyz ynsanlaram giňeýär,
Diňlän asla galmaz paýsyz, eý, Alla!

Namaz, zikir okap etdim dilegi,
Dergähiňde eýle kabul, eý, Alla!
Süllümbaý edip men ezdim ýüregi,
Galmaz ýaly kalpda dowul, eý, Alla!

Medinede berdik salam ilçiňe,
Pygambere rehmet bergil, eý, Alla!
Tagzym etdik seň Ýerdäki synçyňa,
Dileglere “Ämin!” diýgil, eý, Alla!

Eziz - amal boldy Umra zyýarat,
Hernä ony kabul et sen, eý, Alla!
Diňe saňa biz edýäris ybadat,
Ol dogalar saňa ýetsin, eý, Alla!

2-10-njy dekabr 2025-nji ýyl,
Mekge we Medine