İlqar Kərimov - Selcan rəqsi (İnstrumental-Qarmon, yeni versiya)

Bəstə və solo qarmon: İlqar Kərimov
Nagara: Elşad Şəkili
Aranjıman: İlkin Teyifi
Səs rejissoru: İmran İbrahimov

-------
İlqar Kərimov Azərbaycanın qarmon sənətində özünəməxsus yeri olan sənətkarlardandır. Onun musiqiyə olan sevgisi erkən yaşlarından başlayır. Cəmi altı yaşında ikən qarmon ifa etməyə başlayan İlqar müəllimin ilk müəllimi Şəkidə tanınmış musiqiçi-pedaqoq Nurəddin Bədəlov olmuşdur. Daha sonra o, Şəkinin tanınmış musiqiçisi Vaqif Mustafayevdən dərs alaraq bu sənətdə püxtələşmişdir.

İllər ərzində müxtəlif ansambllarda çıxış etmiş, tələbəlik dövründən etibarən həm klassik, həm də folklor musiqisinin təbliğinə öz töhfəsini vermişdir. O, uzun müddət musiqi kollektivlərində və dövlət ansambllarında qarmon ifaçısı kimi fəaliyyət göstərərək, ölkənin bir çox tanınmış sənətkarları ilə səhnə bölüşmüş, dövlət televiziyalarında və canlı konsert proqramlarında çıxış etmişdir.

İlqar Kərimovun ifasında səslənmiş rəqslər və bəstələr Azərbaycan Televiziya və Radiosunun Fonduna daxil edilmiş, Azərbaycan radiosunda (105 FM) dəfələrlə yayımlanmışdır. Əsərləri Əqli Mülkiyyət Agentliyi tərəfindən rəsmiləşdirilmiş və müəlliflik şəhadətnamələri ilə təsdiqlənmişdir.

Son dörd ildə onun yaradıcılığı daha da məhsuldar olmuş, bu müddət ərzində 26 rəqs və instrumental kompozisiya bəstələmiş və onları özü ifa edərək dinləyicilərə təqdim etmişdir. Bu əsərlər həm milli ruhu yaşadan, həm də müasir musiqi zövqünə cavab verən melodiyalardır.

İlqar Kərimovun sənətə olan sadiqliyi, zəhməti və yüksək musiqi zövqü onu Azərbaycanın seçilən qarmon ustalarından birinə çevirmişdir. O, yalnız ifaçı deyil, həm də qarmon sənətini sevən və yaşadan bir sənətkar kimi tanınır.