Գիշերային

Քրիստոս Աստուա՛ծ մեր, անճառելի տէրութեանդ շնորհիւ եւ բարեխօսութեամբ օրհնաբանեալ անարատ ծնողիդ՝ սրբուհւոյ Աստուածածնին եւ միշտ Կուսին, լուսաւորեալ պայծառացո՛ զհոգիս համօրէն հաւատացելոց, յուսով ի Քեզ ննջեցելոց, եւ այնոցիկ, որք ընդ հովանեաւ սրբոյ տաճարիս են հանգուցեալ:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ ՕՐՀՆՈՒԹԵԱՆ


Օրհնութիւն հինգերորդ կիւրակէին Աղուհացից բկ.

(Օրհ. Մեծի պահոց Ե կիւրակէի բկ. Ա.)


Որ պատուիրան ճշմարտութեան աւանդեցեր Եկեղեցւոյ Քո, Քրիստո՛ս, անսահման ժամանակաւ աղօթել միշտ առ Աստուած հոգւով եւ մտօք:
Որ զբան Քո օրինաց հաստատեցեր գործով մեզ օրինակ՝ հանելով զգիշերն ի գլուխ յաղօթսն Աստուծոյ բնութեամբ մերով տնօրինաբար, Որում կրկնի ծունր ամենայն:
Վասն որոյ եւ մեք պաղատեսցուք առ Քեզ, Քրիստո՛ս. շնորհեա՛ մեզ յամենայն ժամ լինել Քեզ յանդիման մաքուր աղօթիւք՝ ըստ անմարմնոցն, որ յերկինս:
Աղաչանօք Աստուածածնին՝ անապական Քում ծնողին, զիմանալի աչս սրտից մերոց բացցես ողորմութեամբ՝ հայիլ ի լոյս Քո, Քրիստո՛ս:

(Օրհ. Մեծի պահոց Ե կիւրակէի բկ. Բ., 1-3 տներ)


Դատաւոր արդարութեան հաստատեցեր ի մեզ զմիտս մեր՝ դատել զհոգի եւ զմարմին՝ արդարապէս դատմամբ ըստ օրինաց Քոց, Քրիստո՛ս:
Իսկ անիրաւ դատաւորին, որ ի քաղաք բնութեան մերոյ, ոչ ունելով զերկիւղ Քո սուրբ եւ անպատկառ ի մարդկանէ՝ ոչ առնելով դատ զրկելոյն:
Այլ անմահ սուրբ Փեսայիդ այրի հոգի իմ պաղատի. ուսո՛ զիրաւունս Քո իմում դատաւորիս առնել ինձ դատաստան արդար ընդ ոսոխի մարմնոյ իմոյ:

(Օրհ. Վարդավառի Բ աւուր բկ. Բ.)


Որ գերագոյն փառօք պայծառացոյց զԱդամն առաջին, զոր ճաշակմամբ պտղոյն մերկացաւ զփառս անպատումս, այսօր վերստին փառօք զարդարեաց:
Որ ի նախնումն երեւեալ Մովսեսի ամպովքն ի Սինա, այսօր լուսափայլ ամպովք ի Թաբոր յայտնեալ՝ վկայեաց. «Դա է Իմ Որդի, Դմա՛ լուարուք»:
Որ ի յերկինս վերացոյց հրեղէն կառօք զՀեղիաս, այսօր վայրաբերեալ ի Թաբոր հանդերձ Մովսեսիւ՝ խօսէին զելիցն, որ յԵրուսաղէմ:

(Օրհ. Վարդավառի Բ աւուր բկ. Բ.)


Որ գերագոյն փառօք պայծառացոյց զԱդամն առաջին, զոր ճաշակմամբ պտղոյն մերկացաւ զփառս անպատումս, այսօր վերստին փառօք զարդարեաց:
Որ ի նախնումն երեւեալ Մովսեսի ամպովքն ի Սինա, այսօր լուսափայլ ամպովք ի Թաբոր յայտնեալ՝ վկայեաց. «Դա է Իմ Որդի, Դմա՛ լուարուք»:
Որ ի յերկինս վերացոյց հրեղէն կառօք զՀեղիաս, այսօր վայրաբերեալ ի Թաբոր հանդերձ Մովսեսիւ՝ խօսէին զելիցն, որ յԵրուսաղէմ:

(Տրյ. Մեծի պահոց Գ կիւրակէի բկ.)


Ընդ լուսափայլ զուարթնոյն զՅարուցեալն օրհնեսցուք եւ մաղթելով խնդրեսցուք մաքրել զմեզ ի մեղաց:
Ընդ խնկաբեր սուրբ կանանցն անմահ բուրմանն անուշից խունկս աղօթից մատուսցուք՝ մաքրել զմեզ ի մեղաց:
Ընդ իւղաբերիցն արտասուս զմարդկան Բարձողն արտասուաց պաղատեսցուք արտասուօք մաքրել զմեզ ի մեղաց:
Ընդ Քրիստոսի պահելով՝ յաղթող լիցուք փորձողին եւ ընդ հրեշտակս երգեսցուք. «Փա՜ռք ի բարձունս Աստուծոյ»:

(Տրյ. ապաշխարութեան բկ. Բ.)


Յորժամ գայցես բազում հրեշտակօք, Տէ՛ր, ի դատել զերկիր:
Յայնժամ շարժին զօրութիւնք երկնից, Տէ՛ր, ի յահէ Քումմէ:
Եւ յայնմ աւուր լե՛ր իմ օգնական, Տէ՛ր իմ եւ Աստուա՛ծ իմ:

(Տրյ. ապաշխարութեան բկ. Զ.)


Որ օրհնիս ի հրեշտակաց անդադար, Հա՛յր երկնաւոր, ընկա՛լ զաղաչանս մեր:
Առաջի Քո անկանիմք, Փրկի՛չ, խնդրեմք զթողութիւն բազում յանցանաց մերոց:
Որ գիտակդ ես գաղտնեաց մարդկան, Հոգի՛դ Սուրբ, Տէ՛ր եւ Կենդանարա՛ր, ընկա՛լ զաղաչանս մեր:

(Տրյ. ապաշխարութեան բկ. Է.)


Օրհնեցէ՛ք զՏէր ընդ երկնայինսն նմանեալ դասուց, նո՛ր ժողովուրդք, ասելով. «Քեզ Հօր՝ Տուողիդ մեզ զկեանս, փա՜ռք»:
Երգեցէ՛ք Տեառն երգ նոր, Եկեղեցի՛ք ընտրելոց, որդի՛ք Սիոնի, ասելով. «Քեզ Որդւոյ՝ Շնորհողիդ մեզ զկեանս, փա՜ռք»:
Բարեբանեցէ՛ք զԱստուած ի սքանչելիս սրբութեան Նորա՝ ձայնիւ ցնծութեամբ ասելով. «Հոգւոյդ՝ Պարգեւողիդ մեզ զկեանս, փա՜ռք»:

(Ճշւ. Մեծ. Սուրբ Ծննդեան Է աւուր բկ.)


Սի՛ւն լուսոյ եւ ա՛մպ հովանի, սո՛ւրբ Կոյս, որ ցօղեցեր ի մեզ զՑօղն երկնային, զքեզ բարեբանեմք, Աստուածածի՛ն Կոյս:
Անկէ՛զ մորենի եւ սրովբէ՛ հողեղէն, սո՛ւրբ Կոյս, քանզի Պտուղն կենաց ի քէն տուաւ մեզ, զքեզ բարեբանեմք, Աստուածածի՛ն Կոյս:
Անիծի՛ց լուծիչ եւ քաւի՛չ մեղաց, սո՛ւրբ Կոյս, որ զԱնտանելին յէից ի գիրկս քո բարձեր, զքեզ բարեբանեմք, Աստուածածի՛ն Կոյս:

(Օրհ. Նաւակատեաց Սրբոյ խաչին բկ. Բ.)


Եկա՛յք, ժողովո՛ւրդք ի տաճարի փառաց Քրիստոսի, տո՛ւք ամենեքեան օրհնութիւն ի բարձունս:
Քանզի Թագաւորն Քրիստոս պսակեաց զսա սքանչելի փառօքն Իւրովք. տո՛ւք ամենեքեան օրհնութիւն ի բարձունս:
Ի սմա եւ զօրք հրեշտակաց դասաւորեալ տօնեն Տեառն. տո՛ւք ամենեքեան օրհնութիւն ի բարձունս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

(Օրհ. Մեծի պահոց Ե կիւրակէի բկ. Բ., 4-րդ տուն)


Մարիամ Կո՛յս անարատ, զանապական Փեսայդ աղաչեա՛, զի հաշտեսցի ընդ այրի եղեալ հոգիս եւ միաւորեսցի դարձեալ սիրով ընդ հեռացեալս ի Նմանէ:

ՄԱՂԹԱՆՔ
Փա՜ռք հրաշափառ տէրութեան Քո, Որդի՛ Աստուծոյ. զօրհնեալ եւ զփառաւորեալ, զհրաշալի եւ զյաղթող զտէրութիւնն Քո սուրբ օրհնեմք եւ փառաւորեմք:
Մարդասէ՛ր Տէր, վասն սրբուհւոյ անարատի մօր Քո եւ Կուսի եւ վասն խաչի Քո պատուականի ընկա՛լ զաղաչանս մեր եւ կեցո՛ զմեզ: