swamithoppu ayya pathi therottam 2017

கன்னியாகுமரி மாவட்டம் சாமிதோப்பு அய்யா வைகுண்டசாமி தலைமைப்பதியில் ஆவணி திருவிழா தேரோட்டம் இன்று நடந்தது. தமிழகம் கேரளா உள்ளிட்ட மாநிலங்களை சேர்ந்த அய்யாவழி பக்தர்கள் திரளான கலந்து கொண்டு அய்யாவை வழிபட்டனர்.
சாமிதோப்பு அய்யா வைகுண்டசாமி தலைமைப்பதியில் ஆவணி திருவிழா கடந்த 18ம் தேதி கொடியேற்றத்துடன் தொடங்கி நடைபெற்று வருகிறது.
திருவிழாவின் 11வது நாளான இன்று தேரோட்டம் நடைபெற்றது. தேரோட்ட நிகழ்ச்சியை முன்னிட்டு இன்று அதிகாலை அய்யாவுக்கு சிறப்பு பணிவிடை நடைபெற்றது. 10 மணிக்கு அலங்கரிக்கப்பட்ட பல்லாக்கு வாகனத்தில் அய்யா தேருக்கு எழுந்தருளும் நிகழ்ச்சி நடைபெற்றது. பகல் 12 மணிக்கு அலங்கரிக்கப்பட்ட பஞ்சவர்ண தேரில் அய்யா வீற்றிருக்க தேரோட்டம் துவங்கியது. தேரோட்ட நிகழ்ச்சிக்கு பூஜிதகுரு பாலபிரஜாபதி அடிகளார் தலைமை வகித்தார். பூஜிதகுரு சுவாமி தேரோட்டத்தை துவக்கி வைத்தார். தலைமைப்பதி நிர்வாகி பூஜிதகுரு பையன் ராஜா குரு பொறுப்பேற்று பணிவிடை பணிகளை செய்து வருகிறார். பூஜிதகுரு பால் பையன், பூஜிதகுரு பையன் காமராஜ் மற்றும் பூஜிதகுரு பையன் ஆகியோர் முன்னிலை வகித்தனர். தலைப்பாகையணிந்து காவி உடையணிந்த அய்யாவழி பக்தர்கள் “அய்யா சிவசிவா அரகரா அரகரா” என்ற பக்தி கோஷமிட்டவாறு தேரை வடம் பிடித்து இழுத்தனர். திருத்தேர் கீழரதவீதி, தெற்கு ரத வீதி, மேல ரதவீதி ஆகிய வீதிகளை சுற்றி வந்து வடக்குரத வீதியில் வடக்கு வாசல் முன்பு வந்தது. அங்கு நீண்ட வரிசையில் பக்தர்கள் நின்று அய்யாவுக்கு வெற்றிலை, பாக்கு, பழம், பூ ஆகியவற்றை சுருளாக வைத்து அய்யாவை வழிபட்டனர். பின்னர் மாலை 6 மணிக்கு திருத்தேர் நிலைக்கு வருகிறது. இரவு 9 மணிக்கு அய்யா ரிஷப வாகனத்தில் தெரு வீதி வலம் வரும் நிகழ்ச்சி நடைபெறுகிறது. அதனைத்தொடர்ந்து அன்னதர்மம் நடைபெறுகிறது. தேரோட்ட நிகழ்ச்சியில் தமிழகம் மற்றும் கேரளத்தை சேர்ந்த ஆயிரக்கணக்கான அய்யாவழி பக்தர்கள் கலந்து கொண்டனர்.
கலையரங்கில் அய்யாவழி சமய மாநாடு நடன நிகழ்ச்சி அய்யாவழி இன்னிசை ஆகியவை நடைபெறுகிறது. அதிகாலையில் கொடியிறக்கும் நிகழ்ச்சியுடன் ஆவணி திருவிழா நிறைவடைகின்றது.
திரு விழா நாட்களில் தினமும் காலை மாலை நேரங்களில் பணிவிடையும் உச்சிப்படிப்பு, உகப்படிப்பும், இரவு வாகனப்பவனி மற்றும் அன்னதர்மம் ஆகியவை நடக்கிறது.
திருவிழாவையொட்டி மாவட்டத்தின் பல பகுதிகளிலிருந்தும் சுவாமிதோப்புக்கு சிறப்பு பஸ்கள் இயக்கப்பட்டு வருகின்றது. பாதுகாப்பு ஏற்பாடுகளை மாவட்ட எஸ்பி தர்மராஜன் உத்தரவின் பேரில் கன்னியாகுமரி டிஎஸ்பி வேணுகோபால் மேற்பார்வையில் தென்தாமரைகுளம் போலீஸார் கவனித்து வருகின்றனர்.