OzodDayjest: Карим Баҳриев: Шукрки, ҳозирча ҳаво солиғи ўйлаб топилгани йўқ

Актёр Беҳзод Муҳаммадкаримов “Шайтанат”даги роли учун қанча гонорар олганини маълум қилди. Ўзбекистонда сув солиғи оширилмоқда. Жорий ҳафта матбуот шу каби воқеалар ҳақида хабар берди.

Ўзбекистонда сув солиғи оширилмоқда. Бу ҳақда публицист Карим Баҳриевнинг мақоласида сўз боради (www.xabar.uz, 11 июнь).

Вазирлар Маҳкамаси қарорига биноан, Сув хўжалиги вазирлиги жорий йил 15 июнгача сув ресурсларидан фойдаланганлик учун солиқ ставкаларининг янги миқдори юзасидан таклиф бериши керак.

Муаллифга кўра, солиқлар, тўловлар, божлар – бюджетнинг асосидир. Лекин у мутаносиб бўлиши, иқтисодни ҳалок этар даражада бўлмаслиги шарт.

“Бутун асъасаю дабдабамиз аслида меҳнат қилаётган, маҳсулот яратаётган, иш ўринлари ташкил қилаётган, давлат ва ундан ҳам кўп ўз манфаатига қайишадиган мансабдорлар тортиб олганидан қолган озгина топганига иш юритадиган тадбиркорлар – солиқ тўловчилар туфайлидир. Агар шу иқтисод юраётган бўлса, бу ҳам унинг маҳсулотини сотиб олаётган истеъмолчи халқ туфайлидир. Халқнинг қўлида пул бўлмаса, иқтисод тўхтайди. Юрт фаровон бўлиши учун истеъмолчи халқ қўлида пул қолиши керак. Бутун иқтисодни юритаётган халқнинг ҳаммасидан орттирган бир ҳовуч пулига кўз тикиб, янги ва янги тўловлар ўйлаб топилаётганига ҳайратланасан киши”, - деб ёзади К.Баҳриев.

“Шукр, ҳозирча ҳаво солиғи солингани йўқ”,- дея таскин беради муаллиф.