#LATGOLYSSTUŅDE

Mozais Leivuona nūvods itamuos pošvaļdeibu vieliešonuos izacēle na viņ ar ilggadejuo varys vadeibys turātuoja nūmaineišonu, bet ari ar jaunuokuo pošvaļdeibys vadeituoja īvieliešonu. 24 godus jaunais Dāvids Rubens ar juo puorstuovātuos Jaunuos konservativuos partejis sarokstu Leivuona nūvoda vieliešonuos īgiva 34% vālātuoju atbolstu, izkonkurejūt „Latvejis atteisteibai” i da itam bejušū prīšksādātuoju Andri Vaivodu, kurs pošvaļdeibu vadejs gondreiž tikpat godu, cik niu ir jaunajam prīšksādātuojam.
Dāvids Rubens īt nu Leivuona nūvoda Rudzātim, roksta prozu latgaliski i da šam struoduojs Vaļsts nakustamajūs eipašumūs. Prioritatis, kurys Dāvids uzsviers sovā jaunajā omotā, ir īsaistūša i īdzeivuotuojim tyva pošvaļdeibys puorvaļde i ekonomiskuo stabilitate.

Sovu īīšonu politikā Davids skaidroj ar pylsūniskū aktivitati.
„Kai es varu sēdēt molā, ka es radzu, ka var dareit sovaižuok. Tys ir kotra cylvāka pīnuokums, ka tu saprūti, ka tev ir īkšuos koč kū dareit, tod tū ari izdariet, i nasēdēt iz vītys.”

Dāvids atzeist, ka tys ir lels gūds tik jaunā vacumā uzajimt tik nūpītnu atbiļdeibu.
„Tok skaidrs, ka nagrybātum, ka piec četrim godim mani atguodoj tikai kai jaunuokū pošvaļdeibu vadeituoju, bet ari kai cylvāku, kurs izdareja konkretus mierkus, sasnīdze rezultatu i paleidzēje īdzeivuotuojim.”

Dāvids uzskota, ka da šam jaunu cylvāku īsaisteišona politikā ir bejuse vaira formala. Leluos partejis jaunīšus līk sarokstūs dreižuok, kab izpiļdeitu kvotu.
„Vajag vīnu školuotuoju, vajag vīnu jaunu cylvāku, vīnu zemnīku – nu zinit, kab dažaidys mierkgrupys varātu savuokt, bet tai, ka uzatycātu kai līderam jaunam cylvākam, tys cīši reti nūteik. Dūmoju, ar tū ari myusu saroksts beja eipašs i ari Leivuonu nūvods, ka ite beja tei uzaticiešona jaunam cylvākam kai saroksta līderam i ari kai mēra kandidatam, i niu jau ari kai pošvaļdeibys vadeituojam. Es dūmoju, ka jaunim cylvākim vajag dūt tū realū īspieju dareit, na viņ byut komandā, bet ari vadeit komandu.”

Dāvids sevi raksturoj kai atbiļdeigu i vīnkuoršeibu sauc par vīnu nu sovom stypruokajom eipašeibom. Taipat jis uzskota, ka nivīns nav par jaunu, kab raksteitu, ītu politikā voi dareitu lelys lītys.
„Ka tik ir gribiešona, ka ir apjiemeiba struoduot. I cīši svareigi, ka ir eistī cylvāki, ar kū kūpā dareit.”