تاريخ قرية شنبارة الميمونة بمركز الزقازيق

شنبارة الميمونة بمركز الزقازيق بمحافظة الشرقية – حكاية بلد قديمة خلدتها السينما المصرية بجملة شهيرة
قرية شنبارة الميمونة النهارده تبع مركز الزقازيق فى الشرقية، بس حكايتها قديمة مرت بتحولات اداريه كتيرة اسمها اتذكر فى كتب ومصادر من زمان أوي.
فى الأول كانت بتتكتب شنبارة بس، وده اللى جه فى قوانين ابن مماتي فى العصر الأيوبى وكانت جزء من أعمال الشرقية.
بعد كده اتقال عليها شنبارة المأمونة فى كتب زى الانتصار لابن دقماق والتحفة السنية لابن ابن الجيعان فى العصر المملوكي واللى وضّح إن كلمة "المأمونة" اتضافت علشان يميزها عن قرى تانية بنفس الاسم زى شنبارة منقلا وشنبارة الطنانات.
وكمان الزبيدي اتكلم عنها فى كتابه تاج العروس.
وجت فى كتاب مباهج الفكر بس اتكتبت محرفة سبهارة.
ومساحة القريه فى العصر المملوكى زمان كانت حوالى 1577 فدان، منهم 64 فدان أرض أزرق.
والإيراد بتاعها كان حوالي 2400 دينار وبعدها بقى "بحق النصف".
وفى وقت من الأوقات كانت الأرض باسم الأمير ناصر الدين محمد بن أيار الدواداري، وبعدها بقت للمقطعين والأوقاف وجزء منها أملاك لأهلها .
وفى العصر الحديث اتذكرت القرية باسمها الحالى "شنبارة الميمونة" فى كتب زى وصف مصر والخطط التوفيقية.
و فى سنة 1813م / 1228هـ، محمد علي باشا سجلها رسميًا باسمها ده فى دفاتر الدقهلية وبقت جزء من ميت غمر .
و فى سنة 1259هـ اتفصل منها ناحية تانية اسمها كفر التميمي، وبعد سنة 1903م رجع الكفر ده تانى واتحسب معاها كبلد واحدة.
واتذكرت فى كتاب القاموس الجغرافى كجزء من مركز ميت غمر
وفى يوم 21 أغسطس 1961م صدر قرار بإنشاء وحدة محلية بها.
وفى 7 مايو 1969م، بالقرار الجمهوري رقم 658، اتفصلت من مركز ميت غمر (الدقهلية) وبقت تبع مركز الزقازيق – الشرقية.
فى السينما المصرية البلد دى اتشهر اسمها لما الفنان عادل إمام قاله فى فيلم رجب على صفيح ساخن سنة 1979، وقال الجملة المشهورة:
"أنا من شنبارة الميمونة ومش على الخريطة"
ومن ساعتها اسم البلد بقى معروف على نطاق واسع وخرج حتى خارج نطقها المحلى للعالم العربي .
وفى تعداد سنة 2006م عدد سكانها وصل حوالى 16 ألف نسمة.
والقريه قريبة من الزقازيق، بتبعد حوالى 13 كم بس.
شنبارة الميمونة مش مجرد قرية عادية، دى بلد ليها تاريخ طويل، من أيام ما كانت فى دفاتر أعمل الشرقية بإسم شنبارة ومن بعدها ميت غمر بالدقهلية، لحد ما استقرت دلوقتي تبع الزقازيق بالشرقيه . وحكايه واسم باقى فى الكتب القديمة، وكمان فى ذاكرة الناس والمخيال الشعبي بسبب السينما.ودى كانت الحكايه والمعلومة وفى الختام لا تنسوا دعم اخواننا المستضعفين في شتى بقاع الأرض بالدعاء والمقاطعة ولا تنسوا أن تخبرونا فى التعليقات عن القرى التى تريدونها معنا فى الفديوهات القادمه دمتم سالمين
"شنبارة الميمونة مش بس اسم اتقال في الكتب القديمه أو على لسان النجم عادل إمام في السينما، دي بلد أصيلة وعريقة وتاريخها طويل ومشرف، وأهلها دايمًا بيرفعوا راسها ويفتخروا بانتمائهم ليها ."
ودى كانت الحكايه والمعلومة وفى الختام لا تنسوا دعم اخواننا المستضعفين فى شتى بقاع الأرض بالدعاء لهم والمقاطعة ولا تنسوا أن تخبرونا فى التعليقات عن القريه التى تريدونها معنا في الفيديوهات القادمه دمتم سالمين كان معكم مصطفى شعبان