Ağamirzəni qətldə günahlandıran “Bakılı balası” – Adam bıçaqladı, polislər onu iki il tuta bilmədi

İncəsənət həm də pafos sənətidir, bəzən bir az mənəm mənəlik, özündən demək xoşlayır. Təvazökarlıq edənlər isə bu sənətdə bəzən unudulurlar, düzdür, tarix o adamları birdəfəlik unutmur, yenə nə vaxtsa xatırlayıb layiqli yerinə qoyur. Ancaq təəssüf ki, belə adamlar sənətlərinin çörəyini, məşhurluğunu yaxşı-yaxşı dada bilmirlər.
Biri var idi, dövrünün ən istedadlı mçeyxanaçısı olsa da, sonradan sadəliyi və iddiasızlığı ucbatından kölgədə qalan Molla Məhəmməd...


Əsl adı Məhəmmədqulu olan Molla Məhəmməd 1950-ci ildə Bakının Maştağa kəndində anadan olub. Uşaqlığı “Sovetski”də və Maştağa kəndində keçən gənc Məhəmməd hələ yeniyetməlik illərindən yaddaşı, hazırcavablığı ilə seçilir. Bu səbəbdən də ustadı Hacı Kazım ona Molla ləqəbini verir. Deyilənlərə görə, Hacı Kazım yarızarafat ona tez-tez “mollalıq eləmə” deyirmiş. Elə bu söz də tədricən onun ləqəbinə çevrilir.
14-15 yaşlarında Molla Məhəmməd artıq özündən çox böyük söz sərrafları ilə meyxana deyər, hətta onları bir çox meyxana məclislərində ötüb keçərmiş.

Məhəmməd "Çağırsa ellər gedərəm davaya" meyxanasının sözlərini yazır. Və dost-tanış yanında tez-tez bu meyxananı deyir. Cahangir Novruzov həmin meyxananı Nəsibə Zeynalovaya göstərir və o, da öz növbəsində filmin rejissoru Həsən Seyidbəyliylə məsləhətləşir. Qərara alınır ki, meyxana filmə salınsın. Səsyazma olur, ancaq bundan sonra Molla Məhəmməd filmə çəkilməkdən imtina edir.
Oğlu Xəqaninin sözlərinə görə, atası həmin dövrdə dost-tanışları arasında olan hörmətini itirməmək üçün filmə çəkilməkdən imtina edir. Yəni, “sən də artist oldun” sözlərini eşitmək istəmir. Və bu istək onun filmə çəkilməsindən imtinaya səbəb olur. Ancaq rejissor Molla Məhəmmədin səsini filmə salır.
Molla Məhəmməd uzun müddət həbs yatıb. Buna səbəb isə onun 1982-ci ildə Novxanıda bir məclisdə tanımadığı şəxsi bıçaqlaması olur. Məclislərin birində qəfildən ona bir adam yaxınlaşır və xoşagəlməz sözlər işlədir. Mübahisə yaranır və Molla onu toy çadırının arxasına apararaq iki bıçaq zərbəsi vurur. Çadıra qayıdan meyxanaçı məclis sahiblərinə deyir: “Çadırın arxasında bir nəfəri bıçaqla vurmuşam. Tez xəstəxanaya çatdırın, yazıqdır, ölməsin”.
Məclis sahibi maşınla yaralını xəstəxanaya çatdırır. Başqa bir avtomobillə isə Molla Məhəmmədi aradan çıxarırlar ki, hüquq-mühafizə orqanları onu saxlamasınlar. İki ilə yaxın meyxanaçı müxtəlif məclislərdə gizli şəkildə iştirak edir. 1984-cü ildə isə Ağasəlim Çildağla meyxana dediyi məclisdə milis əməkdaşları onu yaxalayırlar. Məhkəmənin qərarıyla ona yeddi il həbs cəzası verilir. Oğlunun sözlərinə görə atasının vurduğu şəxs şikayətçi olmasaydı, atası daha az cəza ala bilərdi.
Molla Məhəmməd yeddi il azadlıqdan məhrum olunur. Beş il həbsdə qalandan sonra meyxanaçı azadlığa buraxılır.
Məşhur meyxanaçıların sözlərinə görə Molla Məhəmmədin onlarla məşhur meyxanaları, mahnı mətnləri olsa da, çoxları bundan xəbərsizdir. "Gözləmişəm, gəlməmisən, mən də nişanlanmışam", "Bakılı balasıyam", “Neyçün yaratdın məni pərvərdigara?!” meyxanaları da məhz Molla Məhəmmədə məxsusdur .
Həbsxanada olduğu dönəmdə heç bir sənət yoldaşı nə onunla, nə də ailəsiylə demək olar ki, maraqlanmır. Bundan sonra meyxanaçı həmkarlarından incik düşür, iti təbi, şirin avazı və fenomenal yaddaşıyla fərqlənən sənətkarın əsəbləri korlanır. Ancaq həmkarı və tərəf müqabili olmuş Ağamirzə deyilənləri təkzib edir:
“Mən onda bir şey görməmişdim. Həbsdən çıxandan sonra da əvvəlki kimiydi. Şirin, balaca adam idi. Ağasəlimlə dəhşət bir meyxana deyiblər. Allah hər ikisinə rəhmət eləsin.
Mərhum meyxanaçı Elçin Molla Məhəmməddən təxminən iyirmi yaş balaca olsa da, yaxın dost olublar. Hətta Elçin onu özünə ustad hesab edib. Məşədi Babanın Elçinə vurduğu bıçaq zərbələrindən sonra Elçinin həyatını itirməsi Mollaya çox pis təsir edir. Hətta baş verən hadisəyə meyxana da ithaf edir.


Meyxanaçı Elçin Atakişiyevləyə dostu Məşədibaba mübahisə edərkən Məşədibabanın ona vurduğu bışaq zədəsindən sonra həyatını itirib. Deyilənlərə görə Elçinin ölümünə səbəb həm də dostları tərəfindən həkimə gec çatdırılması olub. Bu məsələdə meyxanaçı Ağamirzənin rolu olub olmadığını biz bilmirik, ancaq toyların birində Molla Məhəmməd “şairi sən kənarda saxlayırsan” qafiyəsi ilə dediyi meyxanada qəfil üzünü Ağamirzəyə tutaraq “Elçini sən məzarda saxlayırsan” sözlərini deyir.

Molla Məhəmməd təmtəraqdan, dəbdəbədən tamamilə uzaq biriymiş. Hətta oğlunun dediyinə görə yetərincə pul qazanan atasının heç vaxt şəxsi avtomobili də olmayıb:
“Deyirdi ki, kəndin bütün maşınları mənim maşınımdır. Kimə hara desəm aparır. Amma təsbeh həvəskarı idi. Evdə bəzi təsbehləri qalır. Və bir də xeyli əlyazmaları var. Əgər çap olunsa 2-3 kitab edər”.
Molla təkcə meyxanaçılarla deyil, dövrünün məşhur xanəndələriylə də dostluq edirmiş. Ən yaxın dostu isə mərhum Səxavət Məmmədov imiş.
Ömrünün son günlərini yataq xəstəsi kimi keçirən Molla Məhəmməd 2010-cu il fevralın 23-də vəfat edir.