Tarixi Gəncəmizin məşhur paxlavasının dəqiq reseptini paylaşdım…

Xəmir:
1kq un
3-4 x/q Gəncə qaymağı(olmasa yağlılığı yuxarı xama)
300 qr erinmiş kərə yağı
2 normal boy yumurta(böyükdürsə 1 ədəd)
1 stəkandan az olmazsa olmazı gül suyu
İçlik:
2 kq çəkilmiş qoz
1 kq şəkər tozu
4 x/q hil
Şirə:
4st şəkər tozu
1,5 st su
1st gül suyu
2 x/q limon suyu
Zövqə görə bal
Xəmirin araları üçün:
1kq təmiz kərə yağı
Üzəri üçün:
Sarıçiçək ya da zeferan
Qida boyası

Hazırlanması:
Unun üzərinə digər ərzaqları əlavə edib orta yumşaqlıqda xəmir yoğurun.İsti yerdə,üstü örtülü saxlayın,özünü tutsun(ərzaqlarınız hamısı keyfiyyətli olmalıdır,çox yoğurmalısınız).Şirə üçün su,şəkər tozu və gül suyunu qaynadıb söndürün(çox qaynatmaq olmaz),limon suyunu əlavə edin.İlk istisi çıxdıqdan sonra(isti olmamalıdır) balı əlavə edib qarışdırın(3 x/q kifayət edər),şirəni tam soyumağa qoyun.İçlikçün lazım olan bütün ərzaqları qarışdırın.Ara qatları üçün yağı əridin,ayranını çıxarın,soyusun.Xəmiri 13 kündəyə bölün,2-si digərlərindən qalın olsun,ilk bişirəcəyiniz məcməyini bol yağlayın,ilk böyük kündələrdən birini yayıb,yenə yağ,və nazik kündələrdən birini yayın.İkinci qatdan sonra hər layın arası yağlanmalı və içlikdən bol tökülməlidir.Axır 2 qata içlik deyil,sadəcə yağ əlavə olunmalıdır.Səliqə ilə paxlava kəsimi edin,üzərinə dəmlədiyiniz və azacıq qida boyasi(qırmızı və ya narıncı) qatdığınız su ilə üstünü rəngləyin,həmən,tez edin,yoxsa üzü quruyacaq,yaxşısı 3-3 paxlavanı rəngləyib,bəzək vurun.İstədiyiniz,zövqünüzə uyğun bəzəyi (qoz,gül,badam,boranı tumu ilə,mixək ilə) vura bilərsiniz,20-25 dəqiqə gözlədin(soyuq yerdə)…Köz üzərində bişirin…Soba istəsəniz əvvəlcədən yaxşı qızdırılmış sobada 160 -170 dərəcədə bişirin,üstünü çox qızartmayın.Sobadan çıxmış paxlavaya 5 dəqiqə sonra şirəni əlavə edin.Bir gün gözləsəniz daha dadlı olacaq…