TUMIGIL NA KAYO

TUMIGIL NA KAYO
Homiliya para sa Ikatlong Linggo ng Adbiyento, 14 Disyembre 2025, Mat 11:2-11
Alam nyo, may kutob ako na hindi naman totoong galing kay Juan Bautista ang mensaheng diumano ay ipinaaabot kay Hesus. At sa tingin ko, hindi rin naniniwala si Hesus na totoong galing kay Juan Bautista ang mensaheng umabot sa kanya sa pamamagitan ng bibig ng ilan sa mga disipulo ni Juan. Ang tinutukoy ko ay ang masakit na tanong na galing diumano kay Juan Bautista na noon ay nakabilanggo: “Ikaw na ba talaga ang hinihintay namin o maghahanap na lang kami ng iba?” Sa mas simpleng salita, “Nagkamali ba ako ng pagkilala sa iyo?”
Kung hindi galing kay Juan Bautista ang tanong na iyon, saan ito galing kung ganoon? Ang suspetsa ko, galing ito sa mga intrigero at intrigera na walang ibang hangad kundi ang mailayo ang loob ni Juan Bautista kay Hesus at ang loob ni Hesus kay Juan Bautista. Sa madaling salita, pinagsasabong sila.
Kaya ho tayo mag-iingat sa disinformation. Hindi naman bago iyan. Ang teknolohiya lang ang nagbago—bago pa man mauso ang digital technology at social media, usong-uso na ang fake news. Sa fake news nga napabagsak ni Satanas ang tao at natuksong kumain ng bawal na bunga sa paraiso.
Narinig natin sa unang linya ng ebanghelyo: “Nakaabot daw kay Juan Bautista sa bilangguan ang mga bali-balita tungkol sa mga gawain ng Kristo—ibig sabihin, ang mesiyas na ipinaghanda niya ng daan.” At batay sa narinig niya, nagpasugo siya para nga ipaabot ang masakit na tanong.
Bakit ko sinasabing hindi naniwala si Hesus na galing talaga kay Juan ang mensahe?
—Dahil sa naging reaksyon niya. Kung ilalagay ko sa mas simpleng salita ang reaksyon niya, parang ganito: “Kayo naman—ano ba ang akala nyo kay Juan Bautista? Madaling maniwala sa sabi-sabi? Hindi naman siya parang tambo na sumusunod lang sa ihip ng hangin. Kilala ko siya. Hindi siya ganyan. At laong hindi niya ugali ang maghari-harian at humatol na di totoo.”
Kaya ang importanteng tanong ay: bakit ba iniintrigahan si Hesus? Kasi may naiinggit sa tiwala at paggalang na ipinakita ni Juan kay Hesus. (Kamakailan may taga-media na ibig mag-interview sa akin, “Binabatikos daw po kayo sa social media dahil sa sinabi nyo sa EDSA, ano ang reaksyon ninyo?” Ang sabi ko,”Sa kanila ko na lang sasabihin nang sarilinan ang reaksyon ko, hindi sa publiko.” Kung minsan kasi nagri-react tayo sa akala natin sinabi ng isang tao na hindi man lang napakinggan ang talagang sinabi niya.)
Kaya nga mataas ang pagtingin ni Juan kay Hesus ay dahil napakababa ng loob ni Hesus. Di ba inindorso pa nga siya sa mga alagad niya at tinawag siyang “Kordero ng Diyos na nag-aalis ng mga kasalanan ng sanlibutan?”
Malinaw kay Juan na kakaiba si Hesus. Hindi siya katulad ng mga propetang galit at walang lumalabas sa bibig kundi panghuhusga, pananakot at babala. Hinahanap niya ang mga tupang ligaw. Hindi parusa ang pahayag niya sa mga makasalanan at naliligaw ng landas kundi panawagan na magbago at magbalik-loob. Katulad ng pakikitungong ipinakita niya kina Zaqueo at Mateo, mga taong sanay sa katiwalian bilang mga tax-collectors. Hindi niya sinabing “Hala kayo, bilang na ang mga araw ninyo! Bibitayin na kayo!” Tiningala niya itong Zaqueo na umakyat sa puno ng sikomoro at sinabihan, “Zaqueo, BUMABA ka riyan…”. At kay Mateo sinabi niya, “Halika, sama ka sa akin, saluhan mo ako. Mag-usap tayo.” At nang kaladkarin sa harap niya ang isang babaeng nahuli diumano na nakikiapid sa hindi niya asawa, ang hinamon niya ay ang nakaambang bumato sa kanya, “Ang sinuman sa inyo na walang kasalanan ang maunang bumato.” Pagkatapos ibinangon niya ang babaeng nakalugmok at sinabihan, “Hindi rin kita hahatulan… pero itigil mo na ang buhay pagkakasala.”
Ang pinagkuhanan ko ng inspirasyon ay ang diretsahan na sinabi ni Bishop Tony Tobias nang ipagmisa niya ang mga congressmen kamakailan. Napakabanayad at napakamalumanay ng tono niya pero ang tindi ng sinabi: “Mga kapatid, TUMIGIL NA KAYO!” Hindi iyon paghatol, kundi imbitasyon. Na kung ibig nilang mapalaya ang bayan kulungan ng korapsyon, simula ito sa PAG-AMIN. Sabayan pa ng MABABANG LOOB NA PAHAYAG NG PAGSISISI at gawin ang ginawa ni Zaqueo, kusang-loob na ISAULI ANG KINURAKOT.
Hindi panunumbat kundi paanyaya sa mga nagpatukso at ngayon ay walang mukhang maiharap sa bayan. Napaka-miserableng ngayon ng buhay ng mga nangurakot. Hindi sila dapat kainggitan kundi dapat kaawaan. Paano mo mapapalaking marangal ang mga anak at apo mo kung pakakainin mo sila mula sa perang ninakaw sa taumbayan, habang ang marami sa kanila ay nagugutom, pumipila nang mahaba para makakuha ng endorsement letter para mapaoperahan ang kaanak na maysakit?
Totoo nga, dakila sa lahat ng taong dakila si Juan Bautista. Pero higit na dakila daw ang mga kapuspalad at makasalanan sa kaharian ng langit. Bakit? Dahil alang-alang sa kanila, handang ibuwis ng Anak ng Diyos ang buhay niya para sa kanilang katubusan..........