දුවන සිත එක තැනකට ගේන ප්‍රායෝගික අභ්‍යාසය | හසලක සීලවිමල හිමි

#hasalaka_seelavimala_thero #meditation #ධර්මදේශනා #හසලක_සීලවිමල_හිමි #mindfulness #srilanka #බණ #භාවනාව #bana

☸️ බුදු දහමේ අටුවා කතාවල සහ අභිධර්මයේ එන එතරම් ප්‍රචලිත නැති නමුත් ඉතාම නිවැරදි උපමා 03ක් ඇසුරෙන් විසිරුණු සිත මෙසේ අලුත් කෝණයකින් තේරුම් ගනිමු.

🟦 අළු ගොඩකට ගලක් ගැසීම.

විසුද්ධිමග්ගයේ මෙම ස්වභාවය විස්තර කරන්නේ "භස්ම රාශියකට ගලක් ගැසූ විට අළු විසිරී යන ආකාරය" ලෙසයි.

• සාමාන්‍ය සිතක් හරියට මැටි පිඬක් වගේ. ගලක් ගැසුවොත් (අරමුණක් ආවොත්) එය මැටි පිඬේ එරී නතර වෙනවා. (සිත එක අරමුණක පිහිටනවා).

• නමුත් විසිරුණු සිත අළු ගොඩක් වගේ. රූපයක්, ශබ්දයක් හෝ ප්‍රශ්නයක් නමැති ගල ඇවිත් වැදුණු ගමන්, සිත (අළු) හතර වටේටම විසිරී යනවා.

• එනම්, අරමුණ බාරගැනීමට තරම් සිතේ "බරක්" නැති බවයි. එය ඉතා සැහැල්ලුයි, ඒ නිසාම පාවෙනවා.

🟦 හුළඟේ ලෙල දෙන කොඩිය.

සිත දුවනවා කියන්නේ නිකම්ම පැන පැන යනවා කියන එක විතරක් නෙවෙයි. මෙය අභිධර්මයේ විස්තර කරන්නේ "ධජග්ග" (කොඩියක අග) ලෙසයි.

• කොඩියක් කණුවක ගැටගසා තිබුණත් (ඔබ හුස්ම දෙස බලාගෙන හිටියත්) දැඩි සුළඟ නිසා කොඩියේ අග කොටස වේගයෙන් "පට, පට" ගාමින් ගැහෙන්නට පුළුවන්.

• මෙතනදී කොඩිය කණුව දාලා යන්නේ නෑ. නමුත් එය එක තැනක නිශ්චලව තියෙන්නෙත් නෑ.

• ඒ වගේමයි ඔබ භාවනා කරනවා වගේ පෙනුනට සිත ඇතුලෙන් වේගයෙන් කම්පනය වෙනවා. අරමුණ සිප ගන්නේ නෑ, අරමුණේ වදිනවා විතරයි.

🟦 බීමත් මිනිසෙකුගේ ගමන.

විසිරුණු සිත යනු "එල්ලයක් නැති ගමනක්" ලෙසද හැඳින්විය හැක.

• සාමාන්‍ය මිනිසෙක් යම් තැනකට යන්නේ අරමුණක් ඇතුවයි (A සිට B දක්වා).

• නමුත් බීමත් මිනිසෙක් පාරේ යන්නේ අරමුණක් ඇතුව නෙවෙයි. කකුල තියෙන තැනට ඇඟ යනවා. ඇඟ යන තැනට කකුල තියනවා.

• විසිරුණු සිතත් එහෙමයි. ඊළඟට හිතන්නේ මොකක්ද කියලා හිත දන්නෙ නෑ. එක සිතුවිල්ලකට පස්සේ ඉබේම ඊළඟ එකට පාවෙලා යනවා. පාලනයක් නෑ.

🟥 විසිරුණු සිත යනු අරමුණක් මත "කිඳා බැසීමට" නොහැකිව අරමුණේ මතුපිට "පාවෙමින්" පවතින දුබල ස්වභාවයයි.

ඔබ සැමට තෙරුවන් සරණයි..!