TRUMP AYAA USOO HANJABAY DALKA NIGERIA IN UU DAGAAL KU QAADI DOONO HADDII

Madaxweynaha Mareykanka, Donald Trump, ayaa sii waday hadalladiisa ku adkeysiga ah ee ku wajahan dowladda Nigeria, isagoo sheegay in ay suurtagal tahay in Mareykanku qaado tallaabo ciidan ah oo ka dhan ah dalkaas.

Trump, oo maalintii Axadda la hadlayey wariyeyaasha isagoo saaran diyaaradda Air Force One, ayaa lagu weydiiyay suurtagalnimada in ciidamo dhulka ah loo diro Nigeria ama duqeymo cirka ah la qaado. Wuxuu ku jawaabay:
“Waa suurtagal. Taas macnaheedu waa, waxyaabo kale ayaa dhici kara. Waxaan filayaa waxyaabo badan. Waxaa lagu dilayaa Nigeria Masiixiyiin tiro rikoor ah. Masiixiyiinta ayay dilayaan, si aad u tiro badan. Taas ma ogolaan doono inay sii socoto.”

Hadallada Trump ayaa soo baxay xilli xiisad adag ka taagan tahay waqooyiga iyo bartamaha Nigeria, halkaas oo ay isku hayaan beeralayda Masiixiyiinta ah iyo xoolo-dhaqatada Muslimiinta ah ee ku dagaallamaya dhul daaqsimeed iyo ilaha biyaha.

Dhanka kale, maamulka Madaxweynaha Nigeria Bola Tinubu ayaa ku jawaabay hadallada Trump, isagoo sheegay in dalkiisu soo dhaweynayo taageerada Mareykanka “inta ay tixgelinayaan madax-bannaanida dhulka Nigeria.”

La-taliyaha Madaxweynaha, Daniel Bwala, ayaa u sheegay Reuters: “Waan soo dhaweynaynaa gargaarka Mareykanka, balse waa in ay ixtiraamaan madaxbannaanida dalkeenna.”

Khubarada siyaasadda Afrika ayaa ku tilmaamay hadallada Trump kuwo marin habaabinaya xaqiiqda dhabta ah ee Nigeria, maadaama colaadaha dalkaas aan lagu saleyn karin keliya kala duwanaanshaha diinta. Waqooyiga Nigeria waxaa u badan Muslimiin, halka koonfurta ay u badan yihiin Masiixiyiin, balse dagaallada badankood waxay salka ku hayaan khilaafaad ku saabsan dhul, biyo, iyo kheyraadka dabiiciga ah ee sii yaraanaya.