جمهوررئیس له شهزاده کریم آغاخان سره وکتل

د۱۳۹۲ لمریز کال د لیندۍ ۳۰مه

جمهوررئیس حامدکرزي له شهزاده کریم آغاخان سره وکتل

د افغانستان جمهوررئیس حامد کرزي له شهزاده کریم آغاخان سره وکتل.

په دې کتنه کې چې نن له غرمې وروسته په ارګ کې ترسره شوه، دواړو لورو په افغانستان کې د آغاخان د انکشافي شبکې د عمراني پروژو د کار د چټکتیا او پراختیا په باب خبرې وکړې.

جمهوررئیس حامدکرزي په افغانستان کې د عام المنفعه پروژو، په ځانګړي ډول د روغتیایي، تعلیمي او د فرهنګي میراثونو د برخو په بیا رغونه کې د آغاخان د انکشافي شبکې همکارۍ رغنده او مهمې وبللې او د هغو پر دوام او پراختیا باندې یې ټینګار وکړ.

په مقابل کې شهزاده کریم آغاخان د آغاخان انکشافي شبکې ته د افغانستان د حکومت له لوري د فعالیت د زمېنې د برابرولو له امله مننه وکړه، او په بېلابېلو برخوکې یې په افغانستان کې د دغې شبکې د همکاریو د دوام ډاډ څرګند کړ.

د دغې کتنې په پای کې جمهوررئیس حامدکرزي شهزاده کریم آغاخان ته بلنه ورکړه چې د ۱۳۹۳ لمریز کال د نوروز په نړیوال جشن کې چې د افغانستان په کوربه توب په کابل کې جوړیږي، ګډون وکړي.
------------------
Office of the Spokesperson & Directorate of Communications
Presidential Palace -- ARG
Kabul, Afghanistan
Website: www.president.gov.af