من بائع عصير متجول الى صاحب سلسلة فنادق الماريوت العالمية - قصة حياة جون ماريوت | سنة أولى بيزنس

ان شاء الله النهاردة هنتكلم عن قصة كفاح من أجمل قصص النجاح اللي هتعجبكم جدا وهتتعلموا منها كتير جدا .. هنتكلم النهاردة عن جون ويلارد ماريوت مؤسس سلسلة فنادق الماريوت الشهيرة ..اتولد جون ماريوت في 17 سبتمبر سنة 1900في مستوطنة ماريوت بلاقرب من مدينة أوغدن بالولايات المتحدة الأمريكية .. وكان والده عنده مزرعة .. وكان والده بيعتمد عليه من وهو صغير وبيساعده ..
ولما بقى عنده 14 سنة اتنقل للعيش في سان فرانسيسكو فترة ولكنه رجع تاني لمسقط رأسة ودرس واتخرج من جامعة يوتا سنة 1926.. وبعد ما اتخرج جون من الجامعة سافر على واشنطن .. وبدأ يشتغل بائع عصير ليمون في حي الكايبتول هيل واللي كان أكبر أحياء واشنطن من حيث الكثافة السكانية .. وأغلب اللي كانوا بيجوا الحي ده هما نزلاء الفنادقوكانت الزباين بتيجي تشتري من جون العصير خاصة في فصل الصيف ..
وكان جون بيعامل كل الزباين بشكل لطيف جدا وكان بيخطف إنتباههم بإبتسامته وأسلوبه الجميل.. وده اللي خلى الناس تحب تتكلم معاهوكان جون بيستغل كلامة مع الزباين ويسألهم عن أحوال الفندق اللي هما نازلين فيه .. هل الفندق مريح – هل بتلاقي فيه كل الخدمات .. ومن هنا بدأ يجمع معلومات كبيرة جدا ويعرف شكاويهم ويعرف هما محتاجين ايه .. وبدأ يبقى عنه خبره كبيرة جدا عن كل اللي يبحتاجه نزلاء الفنادق من خدمات وخلافه..
وكان حلم جون انه يأسس فندق مميز ولكنه كان عارف ان الحلم ده صعب جدا في الوقت الحالي ومحتاج مجهود كبير علشان يوصله .. جون ماريوت كان عارف انه لازم يطلع السلم واحده واحده علشان يوصل للقمة ..فضل جون يحوش فلوس من شغلته بائع العصير لحد ما فتح مطعم صغير .. وبدأ نجح بسبب أسلوبه الراقي والمميز وحرصه الشديد على إسعاد الزباين .. وكان دايما يمر على الزباين ويطمن انهم مبسوطين ومفيش أي حاجة نقصاهم ..
وجون مكانش بس بيرضي الزباين .. لا ده كان كمان بيقسم المكسب بينه وبين اللي شغالين معاه .. وكان عارف انه لو اسعد العامل هيكون راضي ويقدم احسن ما عنده في العمل .. وبدأ جون ماريوت يفتح فروع فرع ورا التاني لمطعمه لحد ما بقت سلسلة مطاعم في شرق الولايات المتحدة الأمريكية .. واشتهر جون ماريوت كواحد من أكبر الطباخين في الولايات المتحدة الأمريكية ..
وبدأت سلسلة المطاعم تكسب شهرة كبيرة جدا بسبب النظافة والأكل اللذيذ وخدمة العملاء الممتازة.. جون منسيش حلمه القديم وفي سنة 1957 افتتح فندق صغير في ولاية فيرجينيا وسماه فندق توين بردجز موتور وبعدين غير الاسم وخلاه ماريوت.. وكان عنده خبره وقتها كبيرة جدا في كل اللي محتاجه النزيل في الفندق .. وشغل جون الفندق لمدة 3 شهور بشكل تجريبي ..
وبعد ال3 شهور درس كافة الملاحظات وبدأ في تطبيقها وأعاد تصميم الفندق والخدمات بشكل جديد ..وحقق فندق جون نجاح كبير جدا .... و كان جون ماريوت حريص على انه يسأل النزلاء عن مدى رضاهم عن خدمته فندقه وكمان كان بيسمع لشكواهم .. ودعا فيه قرايبه واصحابه وجيرانه انهم يباتو في الفندق مقابل مبلغ من المال بشرط انهم يكتبوا الملاحظات والمزايا والعيوب في الفندق..
وعمل ورقة وسماها ورقة الشكاوى علشان لو فيه نزيل عنده شكوى يكتبها .. وكان اول فندق يقرر نظام ورقة الشكاوي دي ..ووصل بجون الأمر انه كان بيلبس ملابس موظفين الإستقبال في الفندق وبيشتغل معاهم كأنه منهم .. وكان كمان بيشيل الشنط بتاعت النزلاء ويوصلهم للغرف بنفسه من غير ما النزلاء يعرفوا انه جون ماريوت صاحب الفندق أصلا
وكمان أسس جون ماريوت سلسلة المطاعم العائلية بيج بوي سنة 1967 وسلسلة مطاعم روي روجرز سنة 1968
عاوزين نتكلم عن وفاة جون ماريوت ..وهو عنده 35 سنة بلغه الأطباء انه هيموت قريب لأنه مصاب بمرض السرطان في الغدد الليمفاوية .. وتوقع الأطباء انه هيعيش لمدة شهور معدودة بس .. هو مات فعلا بس بعد 50 سنين من تشخيص الأطباء له بالمرض وهو عنده 85سنة.. مات جون ماريوت وساب وراه تاريخ واسم كبير في عالم الفنادق كلمه السر فيها هو الإبتسامه في وجه العميل وهي سلسلة فنادق الماريوت ..
وبعد وفاة جون ماريوت تسلم ابنه بيل ماريوت إدارة سلسيلة الفنادق وحقق بيها نجاحات كبيرة جدا وكمل مسيرة والده .. وفي سنة 2009 احتفلت سلسلة فنادق الماريوت بعيد ميلادها الخمسين ..
#قصة_حياة_فندق_الماريوت #فندق_الماريوت #جون_ماريوت #قصص_نجاح