អស់ជំនឿលើដីឡូត៍

ការរកស៊ីអ្វីមួយក៏ដោយ ត្រូវតែមានភាពស្មោះត្រង់ ទើបនិរន្តរភាព។ ប៉ុន្មានឆ្នាំមុន ទីផ្សារដីឡូត៍ និងផ្ទះល្វែង (បុរី) ទទួលបានការគាំទ្រច្រើនពីសំណាក់ប្រជាពលរដ្ឋដែលខ្វះលំនៅដ្ឋាន រួមទាំងអ្នកទិញដើម្បីចំណេញទៀតផង ប៉ុន្តែពីរបីឆ្នាំចុងក្រោយនេះ ទីផ្សារផ្ទះល្វែង ដីឡូត៍ ត្រូវបានពលរដ្ឋអស់ជំនឿ ព្រោះម្ចាស់ក្រុមហ៊ុនដីឡូត៍ ម្ចាស់បុរី និយាយខុសពីការពិត ក្បត់ទំនុកចិត្តអតិថិជនរហូតឈានដល់គ្មានដី គ្មានផ្ទះឱ្យអតិថិជន។

ម្ចាស់បុរី ឬម្ចាស់គម្រោងដីឡូត៍ តែងលើកហេតុផលថា មកពីសេដ្ឋកិច្ចពិភពលោក ទើបសាងសង់មិនទាន់ រត់ប្លង់មិនទាន់ជាដើម ប៉ុន្តែនោះគ្រាន់តែជាលេសតែប៉ុណ្ណោះ ធាតុពិតទៅថៅកែទាំងនោះ មានចិត្ត ៣ប្រភេទ គឺទី១ មានចេតនាក្នុងការបោកប្រាសប្រជាពលរដ្ឋ ទី២ អសមត្ថភាពក្នុងការគ្រប់គ្រងហិរញ្ញវត្ថុក្រុមហ៊ុន ដោយចាយវាយផ្តេសផ្តាស ហ៊ឺហាររហូតអស់ប្រាក់សង់បុរី ទី៣ ទិញដីពីម្ចាស់ដើម មិនទាន់បង់លុយអស់ រួចហើយព្យាយាមលក់ក្នុងគម្រោង ដែលជាហេតុធ្វើឱ្យ រត់ប្លង់មិនបានសម្រេច។

ការដែលគ្មានផែនការច្បាស់លាស់ក្នុងការសាងសង់បុរី ឬពុះដីឡូត៍ បានផ្តល់ផលលំបាកជាច្រើនដល់អតិថិជន ប្រៀបបាននឹងការធ្វើបាបពួកគាត់យ៉ាងធ្ងន់ធ្ងរ។ លោកអ្នកម្ចាស់បុរី ដីឡូត៍ មានដឹងទេថា៖ ទម្រាំបានលុយ១ពាន់ ១ម៉ឺនដុល្លារ យកទៅឱ្យលោកអស់ តើពួកគាត់ត្រូវសន្សំ ខំស៊ីអត់ស៊ីឃ្លាន យូរប៉ុណ្ណា? អ្នកខ្លះត្រូវខ្ចីធនាគារទៀត ដើម្បីបង់ ព្រោះចង់បានដី ចង់បានផ្ទះ តែចុងក្រោយគាត់បានទឹកភ្នែក។ សូមផ្តាំទៅម្ចាស់បុរីថា បើមិនកើតសាច់ការអីទេ គ្មានសមត្ថភាពទេ កុំព្យាយាមបោកបញ្ឆោតពលរដ្ឋ សូមយកចិត្តគេដាក់ក្នុងចិត្តយើងផង តើគាត់ឈឺចាប់ប៉ុណ្ណា? លុយក៏អស់ ផ្ទះក៏អត់!!

ដឹកនាំផលិត ៖
-លោក ប្រាជ្ញ ផានិត

Follow facebook: https://www.facebook.com/share/16un1K...