دورتين في شهر واحد.. طبيعي ولا مشكلة؟

وكأن دورة واحدة في الشهر مش كفاية عشان يبقوا اتنين.. أهلًا بكم في عالم اضطرابات الدورة الشهرية التي لا تنتهي
خلينا بس في الأول نتفق أن الدورة الشهرية القصيرة مش المقصود بيها أيام الدورة الشهرية أو الحيض القصيرة أن دورتك تكون بتيجي ٣ أيام أو ٤ أيام بس، لا الدورة الشهرية القصيرة معناها أن السايكل (الدورة الكاملة) بتاعتك كلها، من أول يوم في دورة هرموناتك لآخر يوم اللي بتبدأ فيها ينزل دم الحيض تكون قصيرة.. يعني يفصل بين أول يوم في الدورة، وأول يوم في الدورة اللي قبلها أقل من ٢١ يومًا.. فهماني؟ يعني دورتك الشهرية تتكرر مرتين في الشهر.
بس خلي بالك أن البيريود ممكن تجيلك مرتين في الشهر وتبقى طبيعية برضو.. يعني بافتراض أن الدورة جتلك يوم ١ ويوم ٢٨ يومًا مثلًا.. دي كده دورة طبيعية جدًا مع أنها جتلك مرتين في نفس الشهر عادي.. لكن لو جتلك يوم واحد في الشهر ورجعت اتكررت تاني قبل يوم ٢١ من الشهر نفسه، لا ده مش طبيعي وإنتِ كده بتعاني من اضطراب في الدورة الشهرية.