Lamka Daily | Visit to Mimbung (7th - 10th Jan 2025)

Mual leh guam, sing leh lou te ka en a, lamsuk lamtou, akoi atang te tawn in kapai a, kim leh kiang a sing leh lou, mual leh guam omte ka en a na thupina in azeel suak vek hi. Zing nisuak ka en a mualdawn a hongsuak in sing leh lou ahon salh vak singseng te leh meipi kilawmtak a hong tang phingpheng te ka et in abawl tupa thupidan kamu hi. Pilna siamna napiaksa mihing te'n mual leh mual kikawm tuah theih nading a lampi abawlte uh, tang tung leh kawl sangpipi tung a pai nang lampi akisialte ka en a huchibang hihtheih nading a amaute pilna petu na thupina hong lang hi.

Iit leh ngaihte nek zonna leh vai tuamtuam te ziak in mun khat ah ki omkhawm theilou in mahni naa chiat ah kibuai chiat in kimuh mengmeng haksa a himahleh omna mun chiat a dam hihang chih ikitheih chiang in huai mahmah leng amanpha pen suak hi. Inn mun (HOME) nuamtak nusia in mun gam tampi mual tampi kan in khual kazin a, lamkal ah nuam leh haksa thuak in kapai zel a, khualzinna mun te ah nuamsa leh tawldam tak a om himahleng ka tenna Inn (HOME) bang a nuam ana omkei a, i inn bang chituk in hoihlou in, thupi kei mahleh i inn kan a i tawldamna, i khamuanna, i lungmuanna omlou hi. Mahni inn mahmah ki ngai pen a, mahni inn a iom chiang in ki tawldam in ki lungmuang in nuam kisa hi. Huchimah bang in gingtu Khristian te khovel a iom sung in khualzin lai kihi ahih bang in ahaksa ituah ni om ding a, anuam ituah ni om ding hi. I inn ding itung ma zo hiai bangte ituah ding mah uh ahi, inn taktak (ETERNAL HOME) itung chiang in haksatna, gimna, gentheihna chihte bangmah om nonlou ding ihi.

Follow us on:
Facebook Page:
https://www.facebook.com/TomoloHauzel...
Instagram Page:
  / tomolotography  
YouTube:
   / @tomolohauzel