VI Бөтендөнья татар хатын кызлары җыены

Татарстан Республикасында, Россия Федерациясе төбәкләрендә һәм чит илләрдә яшәүче татар хатын – кызлар җәмгыятьләренең вәкилләре 2021 елның 20 -22 нче маенда Казан шәһәрендә VI Бөтендөнья татар хатын – кызлары җыенында милләтебезнең бүгенге хәле, аның яшәү рәвешен тагын да камилләштерү турында актуаль мәсьәләләрне карадылар.
Мәскәү “Ак калфак” оешмасыннан 7 хатын – кыз катнашты:
Наиля Фатехова – Мәскәү “Ак калфак” рәисе,
Нәзифә Кәримова – язучы, журналист, Мәскәүнең “Татар зыялылары” Клубы мөдире,
Алсу Фатхуллина - Татар мәдәният үзәге,“Нур” ансамбле җитәкчесе,
Гөлфия Якупова - “Нур” ансамбле солисты,
Нурҗихан Симаева - Татар мәдәният үзәге, “Асыльяр” ансамбле җитәкчесе,
Дина Абдуллина - Мәскәү “Татар кызы – 2020” бәйгесендә җиңүче,
Альбина Вәлиева - Татар мәдәни үзәгендә татар теле укытучысы.
Кызларыбыз “Гранд Отель Казан” кунакханәсендә урнашты.
VI Бөтендөнья татар хатын – кызлары Җыенын Татарстан Республикасының Фәннәр академиясында Бөтендөнья татар конгрессының Милли Шура рәисе Вәсил Шәйхразыев катнашында ачып җибәрделәр.
Татарстан Республикасы Язучылар берлегендә “Матур әдәбиятка кызыксыну уяту юллары”, Габдулла Тукайның әдәби музеенда “Тукайлар изге йоласын үтәргә әзерме Сез?”, “Адымнар – Казан” күптелле мәгариф комплексында “Заманча белем бирү шартларында милли үзаңны үстерү” һәм “Яшел яр” укытучылар театры эшчәнлеге белән танышу, хәзерге заман шәхес хатын – кызлары турында фильм карау кебек дискуссион мәйданчыкларда кызларыбыз бик күп мәгълүмат алдылар. “Ирек” мәчетендә вәгазь тыңладылар.
“Чулпан” мәдәни үзәгендә татар хатын – кызларының кул эшләнмәләре күргәзмәсендә Алсу Фатхуллина, Нурҗихан Симаева, Роза Шакирова үз куллары белән эшләнгән намазлыклар һәм дисбеләр күрсәтелде. Алдарак үткән “Казан сөлгесе” бәйгесенә Алсу Фатхуллина чиккән сөлге дә күргәзмәгә куелган иде. Халык осталары һәм һөнәрчеләре җитештергән товарлар ярминкәсе белән таныштылар һәм шунда ук гөрләп “Калфак туе” үтте. Кәрим Тинчурин исемендәге Татар Дәүләт драма һәм комедия театрында Аяз Гыйляҗев әсәре буенча “Өч аршын җир” спектаклен карады ханымнар.
Пленар утырышта Резолюция кабул ителде. Җыенда катнашучылар, хатын – кызларның милли яшәвештә һәм җәмгыяви тормышта тоткан урыннарына кагылган мәсьәләләрне тикшереп, фикер алышканнан соң, түбәндәгеләрне гамәлгә куярга карар ителде:
“Татар дөньясында киң танылган тарихи шәхесләрне, милләтнең танылган татар хатын – кызларын, һәр төбәкнең социаль – икътисадый үсешендә мәгърифәт, мәдәният тармакларында уңышка ирешкән, үз һөнәрендә, гаиләсендә, җәмгыятьтә тоткан урыны белән билгеле хатын – кызларны барлау, олылау, халыкка таныту эшләрен өзлексез алып бару; сәламәт милләт тәрбияләү ысулларын хатын -кызлар хәрәкәте аша җәелдерү, хатын -кызларга рухи тәрбияне Ислам тәгълимәте аша иңдерү, гореф – гадәтләрне, йолаларны саклау; татар милли-мәдәни тормышында мөһим роль уйнаучы хатын-кызларның эшчәнлеген иң мөһим бурычы итеп гаилә тәрбиясен камилләштерүне санарга һәм гаиләләрдә, яшәү урыннарында, уку йортларында милли тәрбия, рухи байлык, әхлакый чисталык шартларын булдыру; балаларны туган телдә сөйләшергә өйрәтүдә, балалар бакчасында, мәктәптә ана телендә укытуда, татар телен иҗтимагый тормышта һәм көнкүрештә куллану мохитен киңәйтүдә татар хатын-кызларының әһәмиятен искә алып, шушы миссияне үтәү турында аңлату эшләрен алып бару”– Карардан өзекләр.
Форумда танышу, үзара тәҗрибә уртаклашу өчен бик уңайлы шартлар тудырылган иде. Оештыру да югары дәрәҗәдә. Һәр чара файдалы, көн кадагындагы мәсьәләләрнең "каймагы" җыелган. Мәдәни программа да чын мәгънәсендә җан азыгы булды. Бар чаралар да җентекләп, уйлап эшләнгән. Искиткеч матур, гаҗәеп тирән эчтәлекле, бар да бик оешкан төстә, күтәренке рухта, бик файдалы җыен булды.
Кызлар бик теләп, үзләренең чын татар хатын-кыз булуларына горурланып, матур милли киемнәре белән башка төбәкләргә үрнәк булып, бар чараларда катнашып, Мәскәү “Ак калфак” оешмасының дәрәҗәсен тагын да күтәреп, яңадан - яңа эшләргә рухланып, иҗади илһам алып кайттылар.