Айнұр Қожахмет Жезқазған қалалық кітапханасы. Шығармашылық кеш. 17.04.2025

Ұлттық кітап күніне арналған ұмытылмас күн…

23 сәуір - ұлттық кітап күніне орай қалалық орталықтандырылған кітапханада алғашқы туындым - “Мерей” кітабының таныстырылымы өтті. Бұл күн менің жүрегімде мәңгі сақталатын ерекше күн болды.
Кітапхана мен үшін жай ғана кітап алатын орын емес. 2016 жылдан бері осы рухани орданың тұрақты оқырманымын. Қаламыздың Гагарин 20 көшесінде аядай кеңседе орналасқан кезінен бастап, бүгінгі заманауи кең ғимаратқа дейінгі жолына куә болып келемін. Сол алғашқы күндерден-ақ маған қолдау білдіріп, шығармашылық өмірге жол ашқан кітапхана қызметкері Айнекен ханымға алғысым шексіз. Ал бүгінгі айтулы күнге кітапхананың басшысы Анар Жамантайқызы ұжыммен бірге осындай ауқымды шараны үлкен сүйіспеншілікпен ұйымдастырды.
Таныстырылым кешінің қадірлі қонағы ретінде ҚР Жазушылар одағы, ҚР Журналистер одағының мүшелері Батырбек Мырзабеков пен Ғазиз Ештанаев ағаларымыз арнайы келіп, жүрекжарды тілектерін білдірді. Осы кеште Батырбек Мырзабеков ағамыздың соңғы шыққан “Ахмет Ишан” кітабының цифрландырылған нұсқасы кітапханаға табысталды.
“Ұлар” әдеби клубының жетекшісі, қаламдас досым Абай Ораз да сахна төрінен ақ тілек арнап, құттықтау хатын табыстады.
Кеш барысында өмірбаяным жайлы бейнеролик көрсетіліп, Алматы қаласындағы #39 мамандандырылған лицейдің ұстазы Назгүл Әлібекқызы мен әрі ақын, әрі жазушы Көкбөрі Мүбарак Қизатұлы бейнежазбалар арқылы айтқан пікірлері оқырманға ұсынылды.
Әрі қарай өлеңдерімді #11 ЖББМ оқушылары мен ЖГК, ЖИГК, тау кен колледжі, Музыкалық қолледж студенттері жатқа оқып, кеш шырайын келтірді.

Ал күтпеген тосынсый – “Мерей” кітабының желісі бойынша қойылған сахналық көрініс болды. Бұл қойылымға аталған колледждер студенттері мен кітапханашылар қатысып, кейіпкерлерді шынайы сомдап шықты. Кітапхана ұжымының жазған сценарийі, актерлік шеберлік, костюм мен таңдалған образдар – барлығы кәсіби деңгейде болды. Өз кейіпкерлерімді тіріліп кеткендей сезіндім. Көңілім толқып, жанарыма жас үйірілді.
Одан әрі оқырмандар өз сұрақтарын қойып, пікірлерін білдірді. Кеш соңында кітапты сахналаған жастарға “Мерей” кітабымды сыйға тарттым. Батырбек ағамыз да өз атынан “Жеті қыз” атты кітабын тарту етті.

Кітапхана басшысы Анар Жамантайқызынан Алғыс хат пен гүл шоғын, естелік сыйлығын алған сәтімде толқығаным сонша, аузыма сөз түспей қалды. Бұл – мен үшін шын мәнінде ең үлкен марапат.

Осындай ыстық ықылас, құрмет пен қолдау үшін баршаңызға мың алғыс!
Мен кітапханаға басымды иіп тағзым еттім…
Сіздер менің шығармашылық жолымның алғашқы қадамдарын жарқын естелікке айналдырдыңыздар.❤️
Оқырман мен кітап арасына алтын көпір салған асыл жандар - кітапхана ұжымы өрлей берсін, атағы кеңге жайылып, оқырмандар үйір болсын, қажырлы еңбектеріңіз елене берсін!

Осы орайда шабытқа себепкер, әрдайым қолдау көрсетіп отыратын Жан құрбым Laura Kainazarova мен Жан жарыма, тілекші анама, бауырларыма, барша жақын жандардың бәріне алғыс айтамын.
ПыСы: кеш аяқталғанда барлық қызметкерлермен қоса Анар Жамантайқызы үстіндегі зерлі бешпетін дереу ауыстырып, столдарды тасып жүгіріп кеткен.
Үйге жеткенше әлгі көрініс көз алдымда тұрды. 🫶

Кітапханаға кел

Ұлылардың ұлағатын сіңіретін бойыма,
Тарихымды терең бойлап, ой қосатын ойыма.
Ғалымдардың хаттары мен даналардың мұрасы ,
Бәрі осында, бәрі осында кітапхана қойнында!

Есігінен кірген сәттен көз түседі сөреге,
Мұнда тұрған әрбір кітап сөйлегісі келе ме?
Әр заманның келбетімен болашаққа жол сілтей,
Шартараптан жиылып тұр ғұламалар тізіле.

Оқырмандар іздегенін тауып кетіп барады,
Зердесі мен ой санасын биіктетіп жоғары.
Қане досым жүр барайық, біздерді де тосады,
Кең құшағын айқара ашып, данышпандар отаны!

Айнұр Қожахмет



#ҰлттықКітапКүні
#МерейКітабы
#Жезқазған
#ҚалалықКітапхана
#ҰларӘдебиКлубы
#Алғыс