Tv Klan - Rama: Përmbytjet, pasojë e papërgjegjshmërisë me mbeturinat

Edhe me kryebashkiakët e vendit, kryeministri Edi Rama përsëriti se përmbytjet e fillim janarit erdhën jo vetëm nga faktorë natyrorë, por edhe si pasojë e papërgjegjshmërisë së atyre që e shohin vendin si landfill, duke hedhur mbeturina plastike kudo.

“Duhet të bëjmë çmos për ta frenuar këtë lemeri papërgjegjshmërie qytetare. Ky është krim shqiptar, për këtë duhet të marrim masa të shpejta. I kam kërkuar ministrit të Pushtetit Vendor të ngrejë një Task Force, për të konceptuar një plan me 3 faza, të përbashkët, që nga sensibilizimi, tek veprimi në shumë dimensione”.

Për të frenuar përmbytjet, Rama tha se do të ngrihet një flotë e dedikuar për forcimin e infrastrukturës mbrojtëse.

“Me një fond të siguruar nga miqtë tanë të Emirateve Arabe prej 20 milionë euro në mbështetje të zhvillimit rural, do të blejmë një sasi domethënëse mjetesh që të vendosen në shërbim të kullimit, pastrimit të kanaleve kulluese kryesore dhe që të funksionojnë sipas nevojave të bashkive, duke adresuar edhe problemin e argjinaturave”.

Kritik u shpreh ndaj kryebashkiakëve, të cilët i ftoi ta shohin territorin me një qasje sipërmarrjeje dhe jo të presin para për të mbijetuar nga buxheti i shtetit.

“S’mund të prisni dot vetëm nga buxheti i shtetit dhe nga qiratë. Duhet të kaloni në një fazë tjetër. Jemi vendi i fundit në Europë, por edhe në botë, ku pushteti vendor shfrytëzon taksat e shqiptarëve, tarifat vendore, por nëse pyetet sa të ardhura i ka sjellë bashkia vetes me veprimtari ekonomike, shifrat janë qesharake dhe totalisht të lidhura me qiratë”.

Kushti i tij për këdo kryebashkiak që do të rikandidojë në zgjedhjet e 2027-ës është “paketa e maleve”, për të cilën shprehu rezerva ndaj të zgjedhurve lokalë.

“Si ka mundësi që s’ka mbaruar faza e parë, çfarë shkence po bëni? Ambicia jonë duhet të jetë 1 mijë investime nga kjo paketë. S’do ketë asnjë rikandidim nëse s’do jetë arritur targeti i këtij projekti. Ky është çelës për të tërhequr njerëz”.

Turizmi është sfida e radhës, teksa shifrat sipas kryeministrit flasin për një rritje me 6.6% më shumë në vitin 2025.

“Çdo bashki, nga Tropoja në Konispol, nga Shijaku deri në Voskopojë, duhet të ketë planin e vet të sezonit”.

Prerazi tha se tokat shtetërore do të jepen vetëm për shërbime hotelerie.

“Nuk bën vaki më që pjesa shtetërore të jepet për vila e pishina, por do të jepet vetëm për hoteleri. Çdo gjë tjetër paguaj kokërr më kokërr, siç ia paguan edhe privatit. Në këtë drejtim bashkitë mund të bëjnë projekte dhe zhvillime të jashtëzakonshme, me përfitim nga asetet publike, zyra, shkolla, kopshte etj., deri tek përfitimi i të ardhurave të drejtpërdrejta”.

Kapitulli i mjedisit mbetet kryesfidë në procesin e negociatave, ndaj urdhrat e kryeministrit ishin të prera për këdo që operon si biznes në fushën e mjedisit dhe sigurisë ushqimore.

“Do t’i therësh bagëtitë tek trotuaret? BE nuk të lejon të bësh këtu asgjë që nuk është 100% e përputhur me rregullat e sigurisë që ka tregu. Fermerët tanë në fshat duhet të jenë të qartë dhe në rast se nuk janë gati, s’kanë asnjë rrugë tjetër veçse të ulin qepenin”.

Në takimin me kryebashkiakët, Rama kërkoi gjithashtu edhe rritjen e kapaciteteve për arsimin profesional, duke nisur nga krijimi i kushteve për laboratorët dhe konviktet.

Tv Klan


SUBSCRIBE to “RTV KLAN” on YouTube for more videos!

Email: info@tvklan.al

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow Tvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/