E01 Vision and Mission of RUA

ទោះបីឋិតនៅក្នុងកាលៈទេសៈបែបណាក៏ដោយ ប្រទេសកម្ពុជានៅតែចាត់ទុកកិច្ចការកសិកម្មជាវិស័យចម្បង ដែលដើរតួនាទីយ៉ាងសំខាន់ក្នុងការចិញ្ចឹមប្រជាជនទូទាំងប្រទេស។ ក្រៅពីចម្អែតក្រពះ និងផ្ដល់នូវជីវជាតិដល់ប្រជាជន កសិកម្មក៏បានជួយមួយផ្នែកធំ ដើម្បីជំរុញសេដ្ឋកិច្ចប្រទេសឲ្យចម្រើនលូតលាស់ផងដែរ។
សូមរំឭកទៅកាន់ប្រវត្តិជូរចត់ដែលកម្ពុជាយើងធ្លាប់ឆ្លងកាត់កន្លងមក ភ្លើងសង្គ្រាមបានឆាបឆេះមាតុភូមិយើងស្ទើរក្លាយទៅជាផេះ ហេដ្ឋារចនាសម្ព័ន្ធ និងធនធានមនុស្សត្រូវបានបំផ្លាញខ្ទេចខ្ទី។ ជាភ័ព្វសំណាង នាវាកម្ពុជាបានរសាត់មកបុកនឹងច្រាំងសន្តិភាព អ្វីៗក៏ត្រូវបានចាប់ផ្ដើមស្ដារឡើងវិញ ក្នុងនោះប្រព័ន្ធធារាសាស្ត្រ ស្រែចម្ការ កិច្ចការចិញ្ចឹម និងថែទាំសត្វ និងកិច្ចការជលផលត្រូវបានយកចិត្តទុកដាក់យ៉ាងខ្លាំង ទន្ទឹមគ្នានឹងសាមគ្គីភាពយ៉ាងមុតមាំរបស់ប្រជាជនខ្មែរផងនោះ ទើបប្រទេសជាតិបានងើបផុតពីភាពស្រេកឃ្លាន និងបន្តអភិវឌ្ឍពីមួយថ្ងៃទៅមួយថ្ងៃឥតមានឈប់ឈរ តាមទិសដៅនៃយុទ្ធសាស្ត្រចតុកោណ។

យុទ្ធសាស្ត្រចតុកោណ ជាគោលនយោបាយអភិវឌ្ឍប្រទេសដ៏ច្បាស់លាស់ និងមានប្រសិទ្ធភាពបំផុត ហើយពីនីតិកាលមួយទៅនីតិកាលមួយតែងផ្លាស់ប្ដូរទៅតាមកាលៈទេសៈជាក់ស្ដែងនៃប្រទេសជាតិ។ ប៉ុន្តែបើទោះបីប្រែប្រួលយ៉ាងណាក្ដី វិស័យកសិកម្មនូវតែ ជាវិស័យចម្បងគេមួយ ដែលរាជរដ្ឋាភិបាលដាក់ចេញ ដើម្បីធ្វើយ៉ាងណាធានាឲ្យបាននូវសន្តិសុខ សុវត្ថិភាព និងភាពសម្បូរបែបនៃស្បៀងអាហារជូនប្រជាពលរដ្ឋ និងជាផ្នែកមួយដែលអាចទាញចំណូលចូលប្រទេសផងដែរ។

បច្ចេកទេស និងធនធានមនុស្ស ដែលមានចំណេះ ជំនាញ គឺជាតម្រូវការពិតប្រាកដនៅក្នុងវិស័យកសិកម្មរបស់កម្ពុជា ដើម្បីជំរុញឲ្យវិស័យមួយនេះសម្រេចបាននូវគោលដៅយុទ្ធសាស្ត្ររបស់ខ្លួន។ ដូច្នេះហើយបានជារាជរដ្ឋាភិបាលយកចិត្តទុកដាក់យ៉ាងខ្លាំងក្នុងការបណ្ដុះបណ្ដាលធនធានមនុស្សប្រកបដោយគុណភាព ដើម្បីយកទៅបំពេញតម្រូវការទាំងនេះ។

ជាគ្រឹះស្ថានឧត្ដមសិក្សារបស់រដ្ឋ ដែលមានវ័យចំណាស់ និងធ្លាប់បណ្ដុះបណ្ដាលសិស្សនិស្សិតឲ្យទទួលបានចំណេះដឹង និងជំនាញពិតប្រាកដរាប់ម៉ឺនកន្លងមក សាកលវិទ្យាល័យភូមិន្ទកសិកម្ម ក៏កំពុងបន្តបេសកកម្មរបស់ខ្លួនទៅមុខ ដើម្បីសម្រេចបាននូវគោលដៅចម្បងរបស់ខ្លួន គឺ សមត្ថភាពក្នុងការបណ្ដុះបណ្ដាលធនធានមនុស្សលើផ្នែកកសិកម្មទំនើប ស្របទៅតាមសម័យកាលរីកចម្រើន។