أسبوع الآلام ~ أبونا لوقا ماهر

الواحد في نهاية الصوم بيحس إنه ضيع وقت كتير وماعملش اللي كان ربنا مستنيه منه ربنا يقوله يعني هتكون زي الابن الضال يقول لا أنا أسوأ على الأقل ده رجع زي السامرية أو المخلع أو المولود أعمى يقول لا يارب أنا زي لعازر اللي مات وريحته طلعت..
لو مالحقناش نعمل اللي كان نفسنا فيه في الصوم الكبير ممكن نلحق أسبوع الآلام.
في سبت لعازر نفتكر إن نعمة ربنا هي اللي قومت لعازر وقادر يقومنا من أي خطية.
في أحد الشعانين نطرد باعة الحمام نحاول نبطل حاجة واحدة سواء عادة مسيطرة علينا أو علاقة غلط او خطية باعدانا عن ربنا.
يوم اثنين البصخة ربنا لعن شجرة التين عشان خالية من الثمر نحاول نثمر في حاجة.
يوم ثلاثاء البصخة تدرب على النظر للسماء يعني ركز على الأبدية وسيبك من الأرض واهتماماتها.
يوم أربعاء البصخة حاول تعترف لو بقالك كتير ما اعترفتش.
يوم خميس العهد اتناول من جسد الرب ودمه.
يوم الجمعة يوم البذل والخدمة والتضحية والتواضع والمحبة.
يوم سبت النور يوم الكرازة ممكن تكرز للمسيح بأنك تكون قدوة تعمل أعمال تمجد اسمه وتخلي الناس تشوف صورة المسيح الجميلة فيك.
ربنا يدينا نلحق اللي فاضل زي أصحاب الساعة الحادية عشر ويعبر بينا في أسبوع البصخة من لعازر الذي أنتن إلى المسيح القائم من الأموات والذي يقيمنا معه.