FEGAMP INFORMA Nº 11: O municipalismo galego reforza o seu compromiso coa ciberseguridade

O presidente da Federación Galega de Municipios e Provincias (FEGAMP), Alberto Varela, participou na inauguración do V Encontro Galego de Ciberseguridade CIBER.gal, que está celebrándose nestes días na Cidade da Cultura. Na inauguración tamén participaron o director da Axencia para a Moderinización Tecnolóxica de Galicia (AMTEGA), Julián Cerviño, e o subdirector xeral do Centro Criptolóxico Nacional (CCN), Javier Candau, e asistiron os deputados provincias de A Coruña, José Ramón Rioboo; de Pontevedra, Ricardo Martínez e Damián Rey; e de Ourense, Marcos Valiño, entre outros convidados institucionais.

Na súa intervención, o presidente da FEGAMP destacou que este encontro xa "é unha cita central na axenda estatal de ciberseguridade" , e as entidades locais "non somos alleas a súa importancia e dos procesos de transformación dixital nos que está inmersa a sociedade no seu conxunto, tamén a sociedade galega".

Alberto Varela sinalou que concellos e deputacións "somos plenamente conscientes de que a transformación dixital é xa unha realidade en todos os municipios galegos. Cada vez ofrecemos máis servizos en liña, xestionamos máis datos e dependemos máis da tecnoloxía para atender ás necesidades da veciñanza" polo que é esencial garantir que "todo ese proceso se faga con seguridade, con medios e con coordinación para que as administracións locais sexan espazos dixitais máis seguros, máis fiables e, aínda, máis próximos á cidadanía".

Tamén fixo fincapé en que "desgraciadamente, ningún concello está libre de sufrir un ataque informático. Os incidentes de seguridade que xa se teñen producido en diferentes puntos do país o demostran. E por iso, temos a obriga de estar preparados". E Varela detívose nos datos do recente informe da AMTEGA sobre os servizos prestados ás administracións locais galegas, que confirman que as 4 deputacións e 109 concellos empregan os sistemas de monitorización dos servizos por internet achegados pola Xunta de Galicia, que permiten identificar e avaliar riscos na rede dende o control da actividade de 170 enderezos IP e 252 dominios, ademais doutros servizos máis especializados segundo cada caso.

A pesares deses esforzos compartidos,o presidente da FEGAMP alertou de "que as barreiras de seguridade das administracións son obxecto de ciberataques, cada vez máis frecuentes, para roubar datos, danar os sistemas, bloquear a xestión administrativa e a prestación dos servizos públicos" polo que "dende os concellos e as deputacións promovemos unha adecuada xestión fronte a situacións de crise por ciberataques. Para garantizar a prestación dos nosos servizos e o desenvolvemento óptimo das nosas xestión, estamos obrigados a revisar, actualizar e reforzar continuamente as medidas de seguridade".