شقال قلبك يا علي؟ | الملا عبدالمحسن العمراني

[ شقال قلبك ياعلي؟ ]

• الملا #عبدالمحسن_العمراني

   • شقال قلبك يا علي؟ | الملا عبدالمحسن العمراني  

• كلمات #ابو_تراب_الاحسائي
• مخطوطة #سيد_حيدر_البراهيم
• مونتاج #حيدر_علي
• مكساج #جهاد_الحداد


--------------------------


اِشـْﮕـال ﮔلبك يا علي من شيّعتها
ﮔـِلـِّي ﭽـم مَرّه متت يوم اِدْفنتها
راجع اِلـْبيتك غصب تسحب اجدامك سحب

الله يجبر لك مصابك يا علي و اِيـْعظـّم اجرك
راجع اِتجر ﮔـوّه جدمك يا علي و مكسور ظهرك
ما اظن حامل جنازه شايل الكون اعله صدرك
و ما اظن حافر ﮔبرها حافر اِبيمناك ﮔبرك

تمشي خطوه اِوْ ترد خطوه الباب ﭽـنـّه اعليك طايح
اِبـْكثر ما مـﭽوي اِبـْفـﮕدها اِبـْشهـﮕتك دخـّان فايح

من شكل خطواتك اِتبان المصيبه
اللطمه ﭽنها اتلاحـﮕـك بعد الحبيبه
چنها روحك تنسلب تسحب اجدامك سحب

من ثـِﮕـُل مَشيكَ كأنه الكون كله وقف ضدك
گوه تمشي ابلا عمامه اِوْ عالخواصر حاط يَدَّك
تمشي حاير بالمدينه ﭽـنهم اِيْجرّوك بعدك
يا يتيم اِبـْلايه فاطم اِو درب اِيصدّك درب اِيْردّك

السكك شتذكرك يحيدر و انته رايح جاي بيها
اتشوف دم بالـﮕـاع منها لو صدى رَنّة بـﭽـيها

و انته راجع لمّن اِتصد باب شتشوف
مـﮕـنعه متروسه دم لو سوط و اِﭽفوف
و بابك اِبـْدمها رَطـِب تسحب اجدامك سحب

يا علي ﭽـم مَرَّه و انته اِمن المصيبه اتموت اِوْ تحيه
و اِلـْﭽوه اِﭽفوف الوديعه اِبنص دليلك خـَلـَّه ﭽـَيـّه
يا علي المسمار احسّه اِلـْشـَﮓ صدر شـَﮓ ليك رِيّه
و اليمين اللي لطمها طـَفـّه عيناكم سويّه


الصفـّعه عالزهره ثـﮕيله و اعله وجهك ظل اثرها
اِلـْنظر اِبعينك يباوع حُمرة اللطمه حدرها


ليش تمشي اِمغمّض اِوْ انته اللي متهاب
اِتخاف احد ينظر اِبعينك سطره و احجاب
ﮔلي هم ظل لك ﮔـَلب تسحب اجدامك سحب


حالك اِيراوي العجايب مـِتـِّﭽـي اعله الحيط اِوْ تنحب
و خطوه تمشي و خطوه ترجع خايف اِتـْصد ليك زينب
هذي اول مَرّه اشعرك انته صاير حيل مُتـْعَب
و ادري بالزهره نحيله من ضلعها اللي تصوّب


شلون تعجز عن حملها تخاف لا تلـﭽم ضلعها
لو فـﮕد اغله الحبايب عَجَّزك ساعة رَفعها


ﮔـِلـِّيْ من هال الثره اعليها يـَحاير
انته لو سلمان اِوْ عمّار ابن ياسر
و اِرجعت بين الغـُرب تسحب اجدامك سحب


راجع اِوْ كل ذكره حلوه بالـﮕبر دافنها معها
بس بُقت ذِكره وحيده تـِلـْحَـﮕـَك ، كسرة ضلعها
بعدك اتشوف الزﭽيـّه و العدو لمّن صُفعها
و التراﭽـي مَدري عندك لو اِجَه الرِّيح اِوْ جـِمَعها


راجع اِوْ كل ذكرياتك بكل شبر بيتك رسمها
على الحايط على العتبه. و عالارض اتلاقي دمها


قلبك اتروع اِوْ تنظر للوطيّه
اِتخاف لا داست جدم دم الزﭽـيـّه
وضعك اهوايه صعب تسحب اجدامك سحب