APREL HADİSƏLƏRİ AZƏRBAYCANLILARIN DOĞMA TORPAQLARINA QAYIDIŞININ BAŞLANĞICI OLDU

Sakit, nizamlı kənd həyatı... Uşaqlar məktəbə, böyüklər işə tələsir. İnsanların bəzisi mal-qara saxlayır, bəzisi tarlada işləyir. Cəmi iki il əvvəl isə bu evlərin yerində xarabalıqlar var idi. İndiki əkin sahələrinin yerini alaq otları basmışdı. Hər gün davam edən atışmaya görə burda yaşamaq mümkün deyildi.
2016-cı ilin aprelinə qədər strateji Lələ Təpə yüksəkliyində Ermənistan ordusunun mövqeləri yerləşirdi. Burdan Azərbaycanın Cəbrayıl rayonunun Cocuq Mərcanlı kəndi çox aydın görünür. Məhz burdan düşmən ordusu Cocuq Mərcanlını atəş altında saxlayır, sakinləri öz doğma torpaqlarına qayıtmağa qoymurdu. Bundan başqa Lələ Təpə yüksəkliyindən bütün ətraf əraziləri nəzarətdə saxlamaq mümkündür. Məhz buna görə, aprel döyüşləri zamanı Azərbaycan silahlı qüvvələrinin əsas məqsədi düşmən ordusunu geri oturtmaq, yüksəkliyi ələ keçirmək olub.
2016-cı ilin aprel döyüşləri zamanı Azərbaycan ordusu əlverişsiz mövqedə olmasında baxmayaraq işğalçı ordunu darmadağın edib. Düşmən məğlub duruma düşməsinə baxmayaraq, itki ilə barışa bilmir. Çox sayda canlı qüvvə və texnika itirsə də, əldən verdiyi mövqeləri geri almağa çalışır.
Hərbçilərimiz deyirlər ki, düşmənin hər bir təxribat cəhdi sadəcə onların çarəsizliyini göstərir. Çünki düşmən yaxşı anlayır ki, Azərbaycan ordusu ondan qat-qat güclüdür. Maddi-texniki təchizat baxımından açıq-aşkar üstünlükdən əlavə, cəbhə xəttindəki uğurlarda Azərbaycan hərbçilərinin döyüş ruhu də mühüm rol oynayıb.
2016-cı ilin aprel döyüşləri Dağlıq Qarabağ münaqişəsində dönüş nöqtəsi oldu. Bu hadisələr yalnız Azərbaycan ordusunun yüksək döyüş hazırlığını, peşəkarlığını nümayiş etdirmədi, eyni zamanda növbəti dəfə xalq-ordu birliyini, Azərbaycan xalqının öz doğma torpaqlarını azad etmək istəyini göstərdi.
Doğma torpaqların müdafiəsi, Azərbaycanın ərazi bütövlüyünün bərpası – ölkənin silahlı qüvvələrinin formasını geyinən hər kəsin əsas məqsədidir. Hər bir hərbçi əmindir ki, təcavüzkar ölkənin silahlı qüvvələri gec-tez Azərbaycanın işğal altındakı torpaqlarını tərk edəcək. Aprel döyüşlərindən sonra azad olunmuş ərazilərin bərpası azərbaycanlıların öz doğma torpaqlarına böyük qayıdışın ilk addımıdır. Bu, həm də düşmənə Azərbaycanlıların öz torpaqlarını işğal altında qoymayacağı barədə xəbərdarlıqdır.