Heydər Əliyev Sarayında Polad Bülbüloğlunun “Eşq və Ölüm” baleti nümayiş olundu

Heydər Əliyev Sarayında Polad Bülbüloğlunun “Eşq və Ölüm” baleti nümayiş olundu

Dünən Heydər Əliyev Sarayında tanınmış bəstəkar, Xalq artisti Polad Bülbüloğlunun “Eşq və Ölüm” adlı 2 pərdəli baleti səhnələşdirilib.

Tədbirdə Azərbaycan Respublikasının mədəniyyət naziri Adil Kərimli, eləcə də ictimaiyyətin, mədəniyyət və incəsənət xadimlərinin nümayəndələri iştirak ediblər.

Tədbiri giriş sözü ilə Azərbaycan Dövlət Akademik Opera və Balet Teatrının direktoru, Xalq artisti Yusif Eyvazov açıb. Daha sonra bəstəkar Polad Bülbüloğlu çıxış edərək əsərin yaranma tarixindən və ideya məzmunundan danışıb.

Baletin librettosu Rusiyanın Əməkdar İncəsənət Xadimi Nadejda Malıgina tərəfindən “Kitabi Dədə Qorqud” eposunun motivləri əsasında qələmə alınıb. Əsərin dirijoru Əməkdar artist Əyyub Quliyev, quruluşçu xoreoqrafı Nadejda Malıgina, quruluşçu rəssamı isə Rusiya Rəssamlıq Akademiyasının akademiki, professor Dmitri Çerbadji olub. Xoreoqrafın assistenti kimi Başkortostan Respublikasının Əməkdar artisti Denis Zayntdinov çıxış edib.

“Eşq və Ölüm” baleti milli ruhu və bəşəri dəyərləri bir araya gətirən səhnə əsəri kimi xüsusi maraq doğurub. “Kitabi Dədə Qorqud” dastanının motivləri üzərində qurulan bu tamaşa həyat və ölüm, sevgi və nifrət, dostluq və xəyanət kimi əbədi mövzulara toxunur.

Polad Bülbüloğlunun musiqisi bu duyğuları dərin emosional çalarlarla tamaşaçılara çatdıraraq ölməz məhəbbəti və qəhrəmanlıq qarşısında ölümün acizliyini tərənnüm edib.

Tamaşa sənətsevərlər tərəfindən böyük maraq və alqışlarla qarşılanıb.