Бұдан былай жекеменшік банктер де жеңілдетілген ипотека бере алады

Бұдан былай Отбасы банк қана емес, жекеменшік банктер де жеңілдетілген ипотека бере алады. Тиісті заңға өзгертулер енгізілді. Енді барлық екінші деңгейлі қаржы ұйымдарына "Тұрғын үй құрылыс жинақтау жүйесіне" қатысуға мүмкіндік беріліп отыр. Қаржы ұйымдарында баспанаға арналған депозиттер де болады. Ал оған мемлекеттен сыйлықақы төлене ме? Бұл өзгерістің пайдасы бар ма? Тақырыпты әріптесім Оразай Нұртайұлы жалғастырсын.
ОРАЗАЙ НҰРТАЙҰЛЫ, тілші:
Бұдан былай жекеменшік қаржы ұйымдары да баспана салымдарын ашып, клиенттеріне ипотека бере алады. Осы күнге дейін бұл мүмкіндік тек Отбасы банкте ғана болған. Енді елдегі банктің бәрі тұрғын үй құрылыс жинақтау жүйесіне қатысады. Алайда заңға сәйкес екінші деңгейлі банктер үшін бірқатар шектеулер сақталады. Мысалы, олар баспана жинағын ашады, бірақ ол депозиттерге мемлекеттен сыйлықақы төленбейді. Экономистер дәл осы тыйым өзгерісті нәтижесіз етеді деген пікірде.
ЖЕҢІС ШӘРІПҰЛЫ, ЭКОНОМИСТ:
Үкіметтің көмегінсіз, қаржысыз, госпремиясыз жүзеге асыру банктерге қиын болады. Бір жағынан қызық та болмайды. Мысалы, жеке адамды алсақ ол ертең қарайды. Отбасы банкте қандай мүмкіндіктер бар? Біріншіден госпремияға, екіншіден 5-7 пайызды мемлекеттік бағдарламалары бар. Сондықтан Отбасы банк пен басқа банктердің мүмкіндіктері бірдей болу керек.
Бірақ экономист жинақ жүйесіне барлық 20-дан астам банкті қатыстырудың қажеті жоқ деп санайды. Тұрғын үй депозиттерін ары кетсе 3 ұйым ашқаны жөн деген пікірде. Ал халыққа сыйлықақы төлене ме, жоқ па маңызды емес. Бастысы несиенің пайызы төмен болса болғаны деп отыр.
Заңға өзгеріс енгенмен, екінші деңгейлі банктерге тағы қандай талаптар қойылатыны белгісіз. Қаржы нарығын реттеу агенттігі әзірге толық түсіндірме бермеді. Ал Ұлттық банк төрағасы Тимур Сүлейменовтың пайымынша, жекеменшіктердің де тұрғын үй жинақ жүйесіне қатысуы бәсекелестік пен таңдауды арттырады.



#Информбюро #31арна #БастыЖаңалықтар #Новости #31канал