Halley se Komeet .... KI-skepping

Hier is die liedjie wat soveel opspraak verwek het na dit op Sterre en Planete van 31 Augustus 2025 op RSG uitgesaai is. Dit was na aanleiding van 'n epos van Rentia Landman van Centurion, wat 'n gediggie gedeel het, wat deur haar dogter, Marelize in 1986 geskryf is tydens die verbyvlug van Halley se Komeet. Soos ons weet, was die komeet maar baie dof, teenoor die vorige verskyning in 1910. Marelize se oupagrootjie het juis die komeet met sy lang stert in 1910 gesien in die droë Karoolug by Aberdeen in die Oos-Kaap.
Sommer vir die interessantheid het ek toe vir ChatGPT gevra om ’n volledige liedjie te skryf met Marelize se gedig en Rentia se epos as agtergrond. Hierdie lirieke het ek toe vir KI (Kunsmatige Intelligensie) gevoer en gevra om dit te toonset - en te sing – alles in Afrikaans.

Die reaksie wat oorweldigend! Hier is 'n paar kommentare daarop:
Johan van Rensburg (van Musiekfabriek-faam) was eerste met 'n WhatsApp waar hy sy verbasing uiter oor die KI-liedjie (sien ook sy plasing elders) en sê dat dit maklik 'n treffer kan wees omdat dit al die eienskappe van 'n goeie liedjie bevat! He sê as Rina (Hugo, sy vrou) nog gesing het, het hy onmiddelik 'n backtrack gemaak sodat sy dit op haar vertonings kon sing en vir die mense vertel 'n masjien het dit gemaak het!

Die liedjie het tot kommentaar uit Nederland gelok:
Hallo Willie, Ek is sedert die begin van Sterre en Planete 'n verslaafde luisteraar en geniet die program steeds. Die rede vir my skrywe: Die AI liedjie wat julle verlede week gespeel het. DIt was doodgewoon ongelooflik mooi! EK speel dit toe vir my vrou en haar kommentaar: een van die mooiste liedjies wat ek ooit gehoor het.
Groeten, Jan Steyn

Nog 'n lekker terugvoer epos van Matt Matthyser:
Goeie Naand Geagte here. Puik program, elke Sondag. Volg al van die eerste episode. Altyd die moeite werd. Graag verwys ek na vanaand, 31 Augustus, afgesluit met n KI-liedjie, "Halley se Komeet". Sonder om voort te borduur, glo ek ander se reaksie sal u noop om die liedjie tot volksbesit te verklaar.
'n Boerneef-oomblik! Aan die Jonge skryfster van die pragtige gedig... 'n staande applous. Uitsonderlik!
Vriendelike groete aan die hele span