د خوست خلک د دغه ولایت له هوايي ډګره اماراتو ته له دوامداره الوتنو خوښ دي

د دې ویډیو په اړه / در مورد این ویدیو

د خوست ځايي مسوولين وايي، د لومړي ځل لپاره په تېر نږدې يوه کال کې پرته له کومې وقفې د دغه ولایت له نړۍوال ملکي هوايي ډګره متحده عربي اماراتو ته الوتنې شوې او لا هم دوام لري.
د معلوماتو له مخې، په تېر کې هم څو ځلې له دغه نړۍوال ملکي هوايي ډګره په موقتي ډول د الوتنو پرانيسته شوې وه خو دا لومړی ځل دی چې د يوې اوږدوې مودې لپاره ترې نږدې هره ورځ الوتنې کېږي.
په متحده عربي اماراتو کې د دغه ولايت يو شمېر مسافر وايي، خوښ دي چې د کابل پر ځای اوس په خپل ولايت کې کښته کېږي.
په متحده عربي اماراتو کې يوه افغان مسافر او د خوست ولایت اوسېدونکي محمدامين پژواک ته وويل: «دا مې لومړی ځل و چې د خوست په هوايي ډګر کې کښته شوم، په ډېره ښه فضا کې ښکته شوم، مخکې به موږ کابل کې کشته کېدو او بيا مو په موټر کې درې څلور ساعته خوست ته سفر کاوه، ډېر به په تکليف وو.»
دغه مسافر وايي، د متحده عربي اماراتو ترڅنګ په نورو خليجي هېوادونو کې هم د خوست زرګونه مسافر شته خو هغوی ته لا هم د خوست له هوايي ډګره د الوتنو زمينه برابره شوې نه ده.
هغه له حکومتي چارواکو غوښتنه وکړه چې له دغه هوايي ډګره نورو هېوادونو ته هم د الوتنو لړۍ پيل کړي.
دغه راز، یو بل مسافر اسماعل پژواک ته وويل: «زموږ وروڼه په نورو عربي هېوادونو کې هم ډېر دي، لکه سعودي عربستان، کويټ او قطر، هغوی ته هم بايد يو تصميم ونيسي چې ټول د ترانزيټ له لارې دوبۍ او له دوبۍ خوست ته مستقيم پروازونه ولري.»
د خوست يو بل مسافر خانجان هم په دې اړه پژواک ته وويل: «اوس صرف اريانا او کام اير شرکتونه پروازونه لري، په کار دا ده چې نور شرکتونه لکه فلای دوبۍ او العربيه هم خپل پروازونه پيل کړي.»
بل لور ته، مسوولین وایي چې په تېر یو کال د خوست له هوايي ډګره متحده عربي اماراتو ته پرله‌پسې پروازونه ترسره شوي دي.