Şəmkir rayonunun Şiştəpə Kəndi haqda BİLMƏDİKLƏRİNİZ

#semkir #azerbaycan #kend
Azərbaycanın milyonerlər kəndi.
Toyları, xarici müğənniləri ölkəyə gətirmələri ilə məşhurlaşan, Azərbaycanın Sankt-Peterburqu adlanan Şəmkirin Şiştəpə kəndi ilə bağlı mühüm faktları təqdim edirik:

Təmtəraqlı toyları ilə son günlər sosial şəbəkələrdə böyük marağa səbəb olan Şəmkirin Şiştəpə kəndi haqqında əvvəllər də çox eşitmişdik. Kəndin bu qədər məşhur olmasının səbəbi isə nə yerləşdiyi ərazisi, nə də ki, füsunkar təbiətidir. Hər zaman kəndlərdə görməyə öyrəşmədiyimiz lüks yaşayış, xüsusi dizaynlı evlər, bahalı maşınlar və bu kimi digər amillər Şiştəpəni özünəməxsus edib.
Əhalisi təxminən 7 min nəfərə yaxındır. Şiştəpəyə, həm də Azərbaycanın “Sankt-Peterburq”u deyirlər. Şiştəpə adı kəndin yaxınlığındakı təpəlikdən götürülüb.
Kənd sakinlərinin tamamı türk əsilli olub, oğuzların Əfşar boyundan olduğu təxmin edilir.
Kənd sakinlərinin önəmli qismi Rusiya və digər xarici ölkələrdə əsasən meyvə ticarəti ilə məşğuldur. Bundan başqa, ənənəvi heyvandarlıq da kənd iqtisadiyyatında əsas yeri tutur. Kənd sakinləri əkinçiliyə də önəm verir.
Bu kəndin yazılmayan, amma hamının əməl etdiyi bir qanunu var. Harda yaşamasından asılı olmayaraq hamı toyunu kənddə etməlidir. Elə bu səbəbdən Şiştəpədə bir-birindən gözəl şadlıq sarayları tikilib.
Yay ayları Şiştəpədə xüsusi toy məclisləri ilə seçilir və daha çox məclisə əcnəbi müğənnilər dəvət olunur. Elə bu günlərdə Türkiyənin məşhur müğənnisi Ebru Gündəş kənddə qonaq olub.
Şiştəpə sakinləri yurdlarına, ailələrinə çox bağlıdır: Sakin sakinlərindən biri belə deyib:
“Bax, ətrafda gördüyünüz bu gözəl mənzillərin heç biri asan başa gəlməyib. Oğullarımız xaricdə yük daşıyaraq, əziyyət çəkərək özlərinə gün ağlayıb. Ailələrinin də rahat olması üçün buradakı yaşayışı da yaxşılaşdırmağa çalışırlar. Yolumuzu, işığımızı, qazımızı onlar çəkiblər. Biri məktəb tikdi, biri xəstəxana. Yenə də nə köməklik lazımdı edirlər”.
Kənd sakinlərinin yarısından çoxu zəngin olsa da, burda da problem var. Sakinlər öz hesabına yol, qaz, işıq, məktəb kimi çətinlikləri həll etsələr də, su problemi hökm sürür.
Kəndin əsas küçəsinə Aprel döyüşlərində şəhid olan polkovnik Vüqar Yusifovun adı verilib.
1924-cü ilə qədər bölgədəki Qarabulaq, Novçalı kimi ətraf yüksəkliklərdə o cümlədən Qozlu dərəsi, Səlimli bulağı adlanan ərazilərdə məskunlaşan Sarı Əhmədli, Sədərəkli, Pərzadlı, Məhərli, Mələkli, Nəsifli, Ziyadlı, Xəlilli, Maşadılar, Namazalı, Comardlı, Arıxlı, Bağlar, Lolaşlı vs. kimi sülalalər şura hökumətinin qurulmasından sonra daha aşağıya, Şiştəpə təpəsinin ətrafına məskunlaşdırılıblar.
Araşdırmalara əsasən kənddə 2 əsrdən çox yaşı olan qəbrlər ortaya çıxıb.Bu cür tapıntılar isə onu göstərir ki, kəndin tarixi rəsmi tarixdən çox daha qədimə söykənir.