قصيدة بشير ابن ظويهر بـالشيوخ سويلم وسلمان ابناء الشيخ محمد بن جريبيع ابن سويلم شيخ الغضاوره

قصيدة الشيخ بشير بن غنام بن ظويهر الغضوري موجهه لشيوخ قبيلة #الغضاوره من عنزة الشيخ/ سويلم بن محمد بن سويلم امير مركز فيضة بن سويلم واخيه الشيخ/ سلمان بن محمد بن سويلم شيخ قبيلة الغضاوره من عنزة :
ياسلامي عليكم والبدايه سلام
عد ما لاح ورقٍ فوق خضر الجريد
يا سويلم محمد ياسليل الكرام
الرجال العظيمه ذات بأسٍ شديد
ومعك سلمان دايم بالمواقف حسام
نعم بك ياسويلم ونعم اخوك العضيد
انتم شيوخ قوم يحتمون الجهام
من الجدود الاوائل لين تجي الحفيد
طيبكم مايوفيه الشعر والكلام
بالزمان القريب وبالزمان البعيد
بالوفاء والمروة تحملون الوسام
وبالـكـرم ماتمـد كفوفكم للـزهـيد
صيتكم بالجزيرة عند كل الانام
طيبكم من قديم وطيبكم من جديد
في صفوف الشيوخ اصفوفكم بالامام
والفعول الجزيله بمن فعلها تشيـد
انت شيخ معرّب من خوال وعمام
الفعايـل شهـيده مـاتبي لـه شهـيد
دون عانيك تاقف لو بحد الحسام
والمـواقـف تبـيّن كـل رجـلٍ رشيـد
ولايهونون ربعي والشيوخ الكرام
اعتبرهم رجال باللوازم رصيد
هم سلاحي وليه بالشدايد حزام
والردي ما احتزم به من قريب وبعيد
الرجال العظيمة للامور العظام
والحمـول الثقيلة زمـلها له فديـد
عارفين مقامك عند عال المقام
جعل عمرك مديد وجعل عمره مديد
البلاد محكومة وكل حدٍ يقام
والحكم بالشريعة هو الحكم الوحيد
التقاضي بشرع الله فوق النظام
وكل مسلم بتحكيم الشريعه سعيد
والمشاكل ماظنّه تنتهي في سلام
كان ماحصل شرعٍ للكرامة يعيد
مابسيف العداله انحنى ولا انثلام
والحكومه عزيزة جعلها في مزيد
مار حنا بلانا من تبيع الذمام
وتستغل المناصب تقل تبغى تسيد
ماتحلل حلال ولاتحرم حرام
الضمائر غشيشه والتعامل لهيد
كيف للمعتدي بالظلم يترك ينام
وين نلقى العدالة والبطانة تكيـد
يمنع الشرع لجل انه يطول الخصام
ويقلب الحق باطل من هو المستفيد
قلتها وباقي لي من كلامي كلام
وانت راعي مواقف دونها ماتحيد
حال دون الحقيقة غيم مدري عسام
وصبرنا وصل حده والمشاكل تزيد
لكن الحق الابلج ما يحجبه ظلام
دام كل السوالف حول حبل الوريد
سال سيل المسيل وشال نزلٍ مقام
وحل بالنزل ياكافي إبليس المريـد
ومن توكل على الله مستحيل يضام
لـو يعيش بزمانه في مكانه وحيـد
ماخضعنا لحيٍ غير رب الأنام
مـالك الكون كله يفعل اللي يريـد
ومن وقف دون حقه ياوقف مايلام
في دفاعه شموخ وللمعاند عنـيد
روسنا من سطرها لو يطول الخصام
ماتلـين بمواقف لو يلـين الحـديد
عشقنا للمراجل من زمان الفطام
مانزلنا منازل ضعف والله شهيد
ولا رضينا بمنزل غير عال السنام
ولا نقول الكلام الا الكلام الاكـيد
واخر القول فيما قلت مسك الختام
جاك شعرٍ جزيـل وجاك قولٍ فريـد
مبتداه السلام ونختمه بالسلام
عد ما لاح ورقٍ فوق خضر الجريد

شعر بشير بن غنام الظويهر