Lerikdə ilk dəfə olaraq fındıq bağları salınır

Lerikdə ilk dəfə olaraq fındıq bağları salınır

Bu ildən etibarən Lerikin iqtisadiyyatına daha bir sahə-fındıqçılıq daxil oldu . Rayonda ilk dəfə olaraq strateji məhsul sayılan fındıq bağlarının salınmasına başlanılıb. Bu məqsədlə Lerikin ucqar kəndi olan Kəlvəzdə 9 hektar ərazidə fındıq tingləri əkilib.

Prezident İlham Əliyev Yevlax rayonunda qeyri-neft ixracatçılarının respublika müşavirəsində ən çox valyuta gətirən məhsullar sırasında birinci yerdə fındığın dayandığını bildirdi. Dövlət başçısı xüsusi ilə qeyd etdi ki, fındıq bizim 19 rayonda daha çox yetişdirilir, ancaq potensial 46 rayonda var. Prezident İlham Əliyevin ölkəmizdə ixrac potensialına malik məhsulların yetişdirilməsi, xüsusilə fındıqçılıqla bağlı əlavə tədbirlərin görülməsi ilə bağlı verdiyi tapşırıqlardan sonra Lerik rayonuna bu il ilk dəfə olaraq Zaqatala rayonundan 10 min ədəd fındıq tingi gətirilib.Lerik rayon İcra Hakimiyyətinin Sosial-iqtisadi inkişafın təhlili və proqnozlaşdırılması şöbəsinin müdir müavini Vüqar Mirzəyev bildirdi ki, dəniz səviyyəsindən 1700 metr yüksəklikdə yerləşən Kəlvəz kəndi Lerikin ucqar kəndlərindən sayılır. Dağlıq ərazidə 30 ildən artıq istifadəsiz qalan torpaqlarda əkilən fındıq ağaclarının hər bir kolu üçün 4 ədəd sağlam ting seçilib. Əkilən ağaclar arasındakı məsafə isə 4-5 metrdir. Artıq bütün aqrotexniki qulluqları aparılan ağacların əkilməsi prosesində 50-ə yaxın işçi qüvvəsi çalışır.9 hektar ərazidə salınan bağdakı ağaclar hələki əl əməyi və yaradılmış suni göllər vasitəsi ilə suvarılır. Daha sonra damcı üsulu ilə suvarılacaq. 3 ildən sonra bar verəcəyi gözlənilən fındıq ağaclarının hər birindən 4-5 ilə 100-150 kiloqrama yaxın məhsul götürülməsini hədəfləyən fermerin bu sahədə qarşılaşdığı problemlər də var. Hazırda sahələrdə əkin işləri davam edir. Fermer növbəti illərdə fındıq sahələrini genişləndirmək niyyətindədir. Məlumat üçün bildirək ki, BMT-nin Ərzaq və Kənd Təsərrüfatı Təşkilatının hesablamalarına görə, Azərbaycan dünyada fındıq istehsalı və ixracına görə dördüncü ölkə hesab olunur. Ölkədə ildə təqribən 35 min ton fındıq istehsal olunur və onun 90 faizi ixrac edilir. Ötən il ümumilikdə 25 ölkəyə 105 milyon ABŞ dolları məbləğində fındıq ixrac olunub. Məhsul əsasən İtaliya, Rusiya və Almaniyaya satılıb.