Жарытып ақша бермеді! Әскери жаттығуға қатысқан запастағы әскери азаматтар наразылыққа шықты

Маңғыстау облысында жүзге тарта запастағы әскерилер наразылыққа шықты. Олар өздерін әскери комиссариат өкілдері әскери жаттығуға қатысуға алдап шақырғандарын айтады. Сөздерінше, ондағылар азаматтарға 5 күндік әскери жаттығу үшін қомақты сома төлейміз деген екен. Бірақ жиын аяқталғанда жарытып ақша бермеді дейді жиналғандар. Тіпті курорттағыдай жаттығу өткізесің деп шақырып, таза су ішуге де зар қылды деп ашулы. Ал, әскери комиссариат болса жаттығу жиынын ұйымдастыруға әкімдіктің жауапты екенін айтады.
Республикалық ауқымда өткен "Батыл тойтарыс" әскери оқу-жаттығуына қатысқан запастағы жауынгерлер төленетін қаржының тым аз екеніне шағымданды. Әскери комиссариат мамандары "5 күндік жаттығу жиынына қатыссаңыз, қомақты қаржы беріледі" деп хабарлады дейді. Бұған келіскенде, жаттығудың 12 күнге созылатынын бір-ақ білдік деп отыр. "Жұмысымызды мардымсыз қаражат үшін тастап келген жоқпыз" деп ашынған запастағылар, бұл іске жауаптыларды анықтай алмай әлек.
ЕРЛАН БІТІМБАЕВ, запастағы жауынгер:
– 3 күн, 5 күн болады соған 80 мың берілейін деп жатыр деді. Сосын жұмыс орны қалай болады деп едім. Жұмыс орны береді, мына жақтан береді ақша деді. Біз сосын сеніп келдік. Келсек мына жақта вообще басқаша айтып кетті. 90 мың теңге например аламын айына соның үштен бірін беріп тұр. 30 мың теңге 12 мың теңге. Жалақым сақталмаған.
ҚАЙРАТ ДОСОВ, запастағы жауынгер:
– Военкоматтағы апамыз жүр. Ол жалақымды есептегенде бұрынғы мекемеде алып отырған айлығым шықпайтын болып қалды. Себебі азғантай надбавка, за вредность кезінде военкомат төлейміз деп берді ғой. Олар төлемейміз дейді енді. Іштегі үш апа былай жіберді ғой мені "барасың курорт деді ғой былай айтқанда. Мылтық атасың, армияны есіңе аласың, меке еден де ақша аласың, мына жақтан да ақша аласың деді.
Азаматтардың сөзінше, жаттығуға шақырған әскери комиссариат мамандары оқу-жаттығу бір апта уақыт алатынын айтқан. Яғни, сенбі-жексенбі күндері демалыс болады деп ескертті деп отыр. Қорғаныс министрлігінде оқу-жаттығу жиынын ұйымдастыру жергілікті әкімдік құзыретінде екенін, соған сай төлемақыға тек әкімдік өкілері жауап беретінін айтты.
ҒАЛЫМ АНДАЛИЕВ, Маңғыстау облысының жұмылдыру даярлығы және азаматтық қорғау басқармасының басшысы:
– Біз ешкімге уәде берген жоқпыз. 11-22 сәуір аралығында өтеді деп уақытын көрсеттік. Жұмыс орнынан 1 айға алатын жалақысын 30 күнге бөліп, 12 күнінің ақшасын есептеп төлейміз. Нақты белгіленген сома жоқ. Ал жұмыссыздарға ең төменгі айлық мөлшері - 60 мың теңгенің 12 күнге арналған сомасы төленеді.
Жұмысын тастап жаттығуға барғандар ендігі айдағы несиесін қалай төлерін білмей дал. Топырақ астында жаттығу өткізіп, ас-суын ішкен запастағы әскерилер бұл жағдайға қатты ашулы.
Махаббат Нұржанқызы



Бізді әлеуметтік желіде оқыңыздар:
Youtube -   / @informburo31kanal  
Facebook -   / informburo31  
Instagram -   / informburo31  
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#әскери_жаттығулар #өтемақы