KOLOSËT E LUFTËS - Bekim Berisha & Bedri Shala - Pjesa 1

Bekim Berisha-Abeja dhe Bedri Shala janë dy figura qendrore të luftës së Ushtrisë Çlirimtare të Kosovës. Ata vërtetë ishin kolosë të kësaj lufte. Bekim Berisha përvjojën e luftës në Kroaci dhe Bosnje e dëshmoi sidomos në luftën për çlirimin e Kosovës, ku ishte ndër themeluesit e Akademisë ushtarake të UÇK-së në Açarevë të Drenicës. Ai mori pjesë në shumë beteja frontale kundr forcave serbe në Drenicë dhe në Dukagjin. Në kohën luftimet në mes të forcave serbe dhe atyre të UÇK-së u ashpërsuan shumë në Zonën Operative të Dukagjinit. Bekim Berisha bashkë me dëshmorin Bedri Shala shkuan në Gllogjan të Deçanit, duke u bërë kështu krah i fortë i komandantit Ramush Haradinajt dhe luftëtarëve të Dukagjinit. Këtu Bekim Berisha dhe Bedri Shala treguan shkathtësi në përgaditjen ushtarake të ushtarëve të rinjë, e sidomos edhe në bartjen, sigurimin dhe grumbullimin e armatimit.
Luftëtari i UÇK-së Bekim Berisha, në Betejën e Junikut, më 29 maj 1998, u angazhua në mbrojtje të kësaj zone, e cila kishte një rëndësi të veçantë strategjike, duke dhënë kontributin maksimal në mbrojtjen e këtij fshati që të mos bie në duar të forcave serbe të cilat e kishin rrethuar me nje arsenal të madh ushtarak e njerëzor.
Më 26 korrik të vitit 1998, Bedri Shala, Bekim Berisha, Rasim Kiçina e luftëtarë të tjerë të shquar të Ushtrisë Çlirimtare të Kosovës, ndeshen me forcat serbe në afërsi të fshatit Jasiq. Trimat e UÇK-së i thyejnë forcat serbe dhe më 28 korrik, Bekim Berisha, Bedri Shala e të tjerë vendosen në Junik, i cili asokohe ishte nën kontrollin e Ushrisë Çlirimtare të Kosovës. Më 9 gusht të vitit 1998, në tërë vijën e frontit në zonën e Junikut janë zhvilluar luftime të ashpra dhe të pandërprera të forcave të Ushtrisë Çlirimtare të Kosovës, kundër forcave policore dhe ushtarake serbe. Atë ditë bie në altarin e atdheut Bashkim Leku, bashkëluftëtar dhe shok i ngushtë i Bedriut. Më 10 gusht, Bedri Shala, Bekim Berisha, Permet Vula, Elton Zherka, Ibrahim Krasniqi, Rexhë Morina, Hajdin Bala, Ramiz Bytyçi e të tjerë ndërmorën aksione të panumërta kundër forcave armike, të cilat bënin përpjekje të pareshtura për t’i marrë nën konroll dy pikat më strategjike ushtarake, Junikun dhe Smolicën.
Më 10 gusht, forcat e Ushtrisë Çlirimtare të Kosovës përballojnë me sukses sulmin e furishëm të ushtrisë armike, në Junik. Luftimet në mbrojtjen e Junikut i udhëhoqën komandantët e mirënjohur Bekim Berisha dhe Bedri Shala. Në këtë betejë, pushtuesi serb u detyrua të tërhiqet nga vend luftimi, duke lënë ushtarët e tij të vrarë, si dhe disa tanke e automjete të tjera ushtarake. Duke e parë një tank të armikut. i mbetur pa efektivin udhëheqës, Bedriu i afrohet tankut me qëllim që ta tërheqë nga vija e luftimeve. Ai kishte pasur dëshirë të zjarrtë që ta çonte një tanks në Drenicë. Shokët ia kishin tërhequr vërejtjen, meqë luftimet ende nuk ishin ndërprerë dhe rreziku nga zjarri ishte evident. Në momentin kritik, derisa ishte afruar për të hyrë në tank, një plumb snajperi i armikut e godet në kraharor.
Komandant Bekim Berisha, me disa luftëtarë, organizojnë një kundërsulm të fuqishëm kundër forcave ushtarake e piolicore serbe në Junik me mortaja dore të tipit 150 dhe 500 dhe arrin te trupi i plagosur i Bedriut. Me këtë rast zhvillohen luftime të ashpra. Në tërheqje e sipër, një predhë e armës armike godet për vdekje edhe Bekim Berishën. Me gjithë ndihmën e dhënë mjekësore, Bekimi dhe Bedriu bien në përjetësi.
Rënia e Bekim Berishës dhe Bedri Shalës ne fushë të nderit, bashkë me luftëtarët trima Elton Zherkën, Përmet Vulen, Bashkim Lekun e tjerë ishte humbje e pakompensueshme për UÇK-në.
Për kontributin e jashtëzakonshëm në luftën për liri e pavarësi, Bekimi dhe Bedriu u graduan Gjeneralë-majorë nga SHP i TMK-së dhe nga Presidenca e Republikës së Kosovës u dekoruan Heronjë të Kosovës.