هل منحة ال ITI مهمة ؟

ايه رايك في معهد ال ITI ؟
هل لو انا شغال اخد المنحة دي ولا لا؟
طب لو اخدتها هل المفروض اضيفها للخبرة؟
ايه اكبر ميزة بطلع بيها من المنحة دي؟

انا ديما اي حد بيسالني بقوله لو انت شغال ال ITI ملهاش لازمة معاك .. وان ال ITI بجانب التعليم اللي بتقدمه .. ميزتها القوية فعلا في انها بتساعدك في اول فرصة شغل لان دي اصعب حاجة انما لو اشتغلت فعلا في مكان .. يبقا وجودك في ال ITI هيضيع وقتك.

واحد صاحبي كان شغال في شركة صغيرة وعايز يطلع منها ويروح ال ITI وانا كنت ضد دا تماما .. دلوقتي هو الحمدلله شغال في حالا وشاطر جدا وال ITI فعلا كانت هتاخد وقت منه وكانت ممكن تضيع عليه فرصة زي دي لو راح.

انا برشح ال ITI لاي حد معندهوش معرفة لمجال البرمجة او مدرسهوش اصلا او حد بيدور علي اول فرصة لسه .. انما لو ربنا كرمك بفرصة حتي لو شركة صغيرة .. خلاص انت بدات ال career بتاعك وخطوة خطوة واتعلم كويس وهتوصل لاي مكان انت عايزه.

انا فاكر بنت واخده ITI منحة ال ٩ شهور وكانت شاطرة .. عملتلها recommendation عندنا في الشركة كجينيور واترفضت وال recruiter قالتلي انها عايز حد عنده خبرة حقيقية في شركات .. انا قولت للبنت دي انا فاكر انها اضايقت وبتقولي يعني ايه وليه مبيحسبوش ال ITI خبرة سنة؟ هنا كانت لازم تفهم يعني ايه professional experience ودي خبرة جوا شركات مينفعش نطبق عليها اي كورسات تعليمية.

معلومة .. انا اخدت ITI واتبعتلي ادرس هناك للطلاب لما كنت معيد .. الموضوع بنتكلم فيه بحيادية وبشكل عادل لكل الناس .. بالتوفيق.