حسين عبدالناصر السعدي قال ابو لوزه انبدا بزاجر وهاتف

جواب الشاعر المغفور له شايف محمد الخالدي القعيطي
على الشاعر عبدالله صالح العلفي الحاشدي
لحن وغناء حسين عبدالناصر السعدي
🔵🔵🔵🔴🔴🔴🔴🔴🔴🔴
🔵🔵🔴🔵⚪️⚪️⚪️⚪️⚪️⚪️
🔵🔵🔵⚫️⚫️⚫️⚫️⚫️⚫️⚫️
قال ابو لوزه آنبدا بزاجر وهاتف
نطعن الحاشدي بين الكبيده ولنجاف

ذي وقف لي حجر عثره ودائم ملاقف
مادرى إن عادنا واقف لكسّار الالقاف

با اطعن الخصم في نحره وبين المقاحف
من سقط من على يدي صعيب التلفلاف

كيف يطعن بحقي شخص مطشوش طافف
موقفه في مثل موقف هدف راس مطفاف

وانت ما زلت يا بوقيس تعبان نازف
عاد لك من طبيبك فحص آخر وكشّاف

صرت كذاب ما خصمك سوى الحاج شايف
أيش ساقك تصفصف ضدي الكذب صفصاف

ما معك فايده مهما بدورك تراصف
ضدي الكذب او تكتب في اوراق واشتاف

با تفرح فقط لنذال بي والمكالف
جبر خاطر لذيث يتلهفوا لي تلهاّف

ما دريت إن قد اسقيناهم القير ناشف
فوق ما حصلوا من لطم حامي وكروّاف

كمّن أعصر عصرت أذنه ومريت شاعف
ما انت مسكين مثلك با ازقره زقرة أطراف

دعوة الوالده واسحار شمس المعارف
قلت لي اعمت الصمّام من زيف زيّاف

وأتهت قلت لي أيام جبر العواطف
وانتهى بعدها شهر العسل والتكيّاف

من يصدق كلامك وانت جاحد وسارف
لو حلفت القسم أو جبت لي "مية" حلاّف

عادنا الآن للعمله فتحنا المصارف
أقبل الخير والوادي مثمّر ومصطاف

با نجيب التحف متراصفه للمتاحف
والجماهير با ترتاح بعد التقشاف

والمعاول معانا والحجن والمجارف
والمعدات عندي للعمل كلها ارزاف

لا تفكر بإني ضعت أو اصبحت عاكف
داخل الدار أو مرمي ورى حوش كداّف

أو رهينه على قولك مقيّد وزاحف
عادني بالمحف راكب على مُهر حفاف

با اقطع الحيد راكب والسيل والمعاطف
والمسيرات قدامي محاجر وقطراف

فين تشتيني ارحل يا مغفل وساخف
بعد من بالعصا بتسوقني سوق دلهاف

أيش من قافله ذي قلت لي بعدها خف
الحق القافله واسرع كما برق رفّاف

ما اشتي اطلب مع ذي يطلبوا بالمغارف
قد بكل لقمتي مخصور في صحن شفّاف

والولد "سعد"بسّط لي وفرّش قطائف
قال لي لا تهاب الخصم جب راسه أنصاف

وانت مغرور يا بوقيس أشوفك تخاذف
ساع تزقر ببن عاطف وساع ابن عطاف

فاكر إنك زقرت أم القورون العواكف
وانت بالعكس زاقر في عراقيب وأضلاف

والغلط دائماً منك يجي وانت عارف
زور تشهد وبتصنف لي الكذب صنّاف

قلت ما عاد لي نجده ولا من يساعف
بينما عندي النجدات واجد والاسعاف

عندي ابني وبعد ابني حمات الطوارف
ذي تكيل المذلق للعدى كيل كرداف

مزنة الصيف ذي تسمع لها رعد قاصف
من سمع صوتها أو صوت رجاّتها خاف

حولي انمار فتّاكه ضواري تلاهف
والجواكر معي والرنج موجوده أرداف

جوكري ذاك له بين الجواكر مواقف
الجماهير تشهد له وقاده وعرّاف

مثل شامخ ثمر ما با تهزه رواجف
أو تزعزع حجاره ريح عاصف ونوّاف

لا تصدق دعاية يقولوا مخالف
ذه دعايات قالوها قرابيع واجحاف

هم جراثيم أشبه بالذباب الزواحف
جب لهم في دقيقه واحده سم بف باف

وآخر الأمر جانس ما بنيته ورادف
لا تخزّ سطوح الدار والسقف خزّاف

ما فقد صفنا الوحده ومعنى التكاتف
قلتها أنت لنك ضدنا يا تحلاّف

سهل أمرك ومثلك لا غلط ما يخالف
عين عوجا ومربوطه مع اللان والكاف

ذا جوابي وموضوعك مع حصن نايف
ماتحصفتشي والهرج يشتي تحصاف

إنما قد تجاوزته ومريت شانف
قلت من بعض أشياء با تلطف تلطاف

با نرجع فقط للحاشدي رد كالف
هرج لي خاصبا اتكلف برده تكلاّف

ذا وعن باز ذي بتقول كاتم وكاشف
طول عمره وهو من بطن لا بطن طوّاف

هو شريط المسجل دونما أشرح ولا صف
ذي عنيته وهذه كلها فيه الاوصاف

به عيونه وسط أيضا وله جسم ناحف
يلتقط ما سمع من أي غاني وعزّاف

وانته أحزيك من بكره حريصه وصارف
خازنه قوتها في بطنها للنصراف

ضالمه غاشمه حمقا مقامر مجازف
تقتل أولادها متعمده ضلم وأسراف

واصبحت بعدهم فارغ خلي نوع تالف
لا مضره ولا تقضي مهمه ولا أشفاف

وأذكر المصطفى ما طاف بالبيت طائف
عد ما ثور الجاهم وما البرق رفّاف