Bogatyr Production System (KZ). Қайыр Смайылов. 19.12.2025

5S жүйесі – кез келген салаға енгізуге болатын тиімді басқару құралы. Өндірістік учаскелерде бұл жүйені табысты қолдануға толық мүмкіндік бар. Тіпті кеңсе қызметкерлері де 5S қағидаттарын өз күнделікті жұмысына енгізе алады. Өйткені бұл жүйе, ең алдымен, тәртіпке негізделген: адам тәртіпке бағынады, уақыт өте келе оны дағдыға айналдырады.
5S жүйесін күнделікті өндірістік қызметте белсенді қолданып келе жатқан учаскелердің бірі – Күрделі құрылыс дирекциясының темірбетон бұйымдары учаскесі. Учаске бастығының өзі жүйені енгізу мен сақтаудың басы-қасында жүргендіктен, 5S қағидаттары мұнда тиімді жүзеге асырылуда.
«5S жүйесі – бұл жұмыс орнын рационалды пайдалану деген сөз. Әр қызметкер өз жұмыс орнындағы құрал-сайманды, бөлшектер мен қосалқы бөлшектерді қажетті, қажет емес және сирек қолданылатын деп сұрыптауы тиіс. Бір ай немесе одан да ұзақ уақыт пайдаланылмаған заттар қажетсіз деп есептеліп, жұмыс орнынан алынып тасталады. Ал күнделікті, әр ауысым сайын қолданылатын құралдар әрдайым қолжетімді жерде болуы қажет, – дейді учаске бастығы Қайыр Смайылов.
Қайыр Иманжүсіпұлының айтуынша, учаскеде 5S жүйесінің барлық бес қадамы жүйелі түрде қолданылып келеді. Жұмыс орнындағы тәртіп пен тазалық өндірістік үдерістің ажырамас бөлігі болып табылады. Кез келген тапсырманы орындау барысында қалдықтар мен қоқыстардың пайда болуы заңды, алайда оларды уақытылы тазалап, жұмыс орнын таза ұстау – әр қызметкердің міндеті. Сонымен қатар артық заттар мен қажетсіз құрал-жабдықтардың болмауы да маңызды.
«Жұмыс адамы өз ісінің нағыз маманы болуы үшін үнемі жетіліп отыруы керек. Ал жұмыс орнын жетілдіру – осы жолдағы маңызды қадамдардың бірі», – деп атап өтті учаске бастығы.
Еңбек жолын кеңес кезеңінен бастаған Қайыр Смайылов ол уақытта да еңбек тәртібі мен тазалыққа ерекше мән берілгенін еске алады. Оның айтуынша, қазіргі таңда кәсіпорында енгізіліп жатқан 5S жүйесі сол еңбек мәдениетінің заманауи жалғасы іспетті.
«Біз мұның бәрін қандай да бір байқау үшін емес, ең алдымен өзіміз үшін істейміз. Өз өнімімізді сапалы шығарып, оған қатысты сын-ескертпелер болмаса, бұл – кез келген ұжым үшін үлкен жетістік», – дегенді айтты ол күлімсіреп
Байқау демекші, ағымдағы жылы Темірбетон бұйымдарын өндірумен айналысатын бұл учаскенің №1 цехы «5S талаптарына сәйкес ұйымдастырылған «Үздік нысан» байқауында «Өнім жасау бойынша үздік бөлімше» аталымы бойынша жеңіске жетіпті. Бұл – жүйелі жұмыс пен тәртіптің нақты нәтижесі.