مهداة الى الشيخ عبدالله بن مهدي الكيرعاني كلمات سعد بن شفلوت اداء جفران بن هضبان

لا تحتري ياهجوسي شي لاتحتري
بنات فكر القريحه شرعت بابها

مرت عليك الجفول اللي تشد نظري
خلك وراها تراها زان مضرابها

يجري مع دمها المسك المعتق جري
اغلى عطور المشايخ واجمل اطيابها

ماكنه الا قصيد الشاعر العبقري
لاقام يصخر بيوته ويتغنابها

لو كان كل القصايد خطها ينقري
مالامت الناس قاريها وكتابها

والماقف اللي يبي له شاعر منبري
كل الجماهير صوبه تلوي رقابها

ان جابها ماش قالوا مفتري مفتري
وان جابها صح قالوا جابها جابها

وانا على الشعر ماني بجنبي وانكري
علاقتي به قويه واتباهابها

قصايدي ماتوقف علة ٍ فنحري
اقلط بها فالمنابر واتحدابها

كني على جبهة حدود الوطن عسكري
من كثر ماجاهد الشعار وكذابها

يستهلكون المديح النادر الجوهري
في عالمٍ لو مدحها الشاعر اغتابها

مناكبٍ ماتشيل الا بشوت الزّري
ابشوتنا من سواياها حذفنابها

ما تارد ابل الشيوخ الا على العثري
ولاّ الوقر ماتنوخ عنده ركابها

والمدح فاللاش والبكاش ماينطري
لو كشّخت في ثيابٍ ماهي ثيابها

ولا الزهيري بفعله يازهير افخري
يالعزوه اللي على الضد نتعزوابها

عبدالله الكيرعاني فالمواقف جري
يسوى رجاجيل بلحاها وباشنابها ( تكرار)

اطريه لطريت نجم سهيل والمشتري
كلمة نعم مالقينا غيره اولابها

على المهمات وكبار القضايا ضري
يقلط على الكايده لاحدت انيابها

اشد به منكبي واشد فيه ظهري
في ساعة كنت ماني حاسب حسابها

كفه من المده اللي ماتجمل بري
وفعوله الطيبه كل تقدوابها

والضيف لا جاه يبشر بالمقام الطري
فضيافةٍ مايوقف صوت ترحابها

كنها قصر حاكمِ مطنوخ راس وثري
يلقى هقوايه فيها من تهقوابها

جمع مفاخر عبيدي ونهوة جحدري
واهل المراجل تقدمها وصلابها

عضيده مشورب ومتفرد وعنصري
لاخف وزن الحميه كمل نصابها

من لا تفاخر برايد جعله السكري
في ظله المرجله ماتفقد اعصابها

لا زاد سعر الجميل ومالقى مشتري
الثروه اللي جمعها فيه ضحابها

سعد بن شفلوت