EL JOKER - ZATAK | الجوكر - ذاتك

EL JOKER - ZATAK (Official Audio)| الجوكر - ذاتك
----------------------------

• Written and Performed by: El Joker | الجوكر
• Music: Ahmed Ehab | أحمد إيهاب
• Mix and Master: Ahmed Ehab | أحمد إيهاب
•Artwork: Sir Mix

Produced by ‪@thebasementrecords‬
----------------------------

Lyrics | كلمات الأغنية

مابنشتكيش من الحمول طول ما فينا أكتاف
لولا شيلنا شيلة تقيلة كان زماننا خفاف
ناس كتير بتقول الناس بتقول قليل شاف
قاللي عمو خايف. قولت عندك حق تخاف
ماتقولش هروح وهاجي .. الحظ لا يؤتمن
لما بنغلط نفس الغلطة مابندفعش نفس التمن
عشان في ناس باقي في نصيبها، وناس خدوه مقدما
وناس خدت بزيادة؛ بس هيدور عليها الزمن
آه ، مابتتحسبش بورقة وقلم
وجعنا مش زي بعضه لو أكلنا نفس القلم
بس هي هي نفس الذئب ونفس الغنم
رسايل للفضاء قابلني لو مخلوق إستلم
حاسس إن عمري ألف عام
ياترى بعد التعويم الألف شمعة تعمل كام ؟
الدنيا بتلعب بيا وبلعب بالكلام
فكك م الفهلوية مفيش أهم من العلام..
تصالح مع ذاتك
انت مش متأخر مهما فاتك
تسامح مع ذاتك
حتى لو اختياراتك سبب معاناتك

الملطوط يحب يلط الناس معاه
لو كله تاه محدش تاه
لو مفيش مرتاح مفيش حد في معاناه
ممكن يطلب مساعدة؛ بس لا السواد عماه
كل الناس في عينيه أداة، حتى أكتر ناس حباه
آه ، بس لكل وحش هبة
ع المدى الطويل مفيش حاجة بتستخبى
والناس مابتتغيرش لو مش حابة
ومش أسوأ سيناريو إنك ناديت ماحدش لبى
وارد تاكل بالجزم
صعب تفرد عودك وسط حزم
في ناس ودانها في خزن جوه خزن
إذا ، خف من التعصب
في الغالب اما تحزق جامد بيقل التأثر
ساعات حتي الضمير لازم تكبحه
لأ مش كل باب تفتحه
ده حتى اللي فهموا ونحوا
هاييجي وقت ويجنحوا
قولت وحماس الشباب مخدرني
هغير العالم .. العالم غيرني
تصالح مع ذاتك
انت مش متأخر مهما فاتك
تسامح مع ذاتك
حتى لو اختياراتك سبب معاناتك

ناس أحسن من اللي بيننا
في الزحمة تاهوا مننا
مع إن ماكانش بيننا خلاف
ولا هما فيهم إن
ده حال الدنيا ، ساعات بتكون غريبة سنة
ساعات نخربها فتبرئنا، ونمشي صح تديننا
آه ، بس أكيد الحسبة ظابطة
حاجات مربوطة ببعض، واحنا مش شايفين الرابطة
ماتجيش علي نفسك المادة مش بتطبطب
الناس ماشيين بسرعة مش أمان انت مش أبطأ
فركز ، وإختار بعناية الوسط
خلي بالك الشمال بيقولوا ع الشمال وسط
ماحدش بياكل إلا بطنه مهما حصد
ولكل ظاهر معنى ظاهر مهما صاحبه قصد
لو نفسك سليمة وسط نفوس لئيمة
يبقي انت في مكان غلط
قوم بينا
التمثيل كذب برة السيما
في حد دايما فوقينا
ساعات تيجي الهزيمة في شكل فوز لينا
اوعى يعميك نور المدينة
تصالح مع ذاتك
انت مش متأخر مهما فاتك
تسامح مع ذاتك
حتى لو اختياراتك سبب معاناتك

بعيش بالأكتر والأقل
دايما بلاقي حل
مؤمن إن عمر الميزان ما اختل
لما الشمس غربت قمر هل
ومش صدفة لما توهت بدون أدلة قلبي دل
لكن للأسف.. في ناس مش شايفة إنها مش شايفة
جاوبوا كل أسئلة ليه؛ لكن بإجابة كيف
بيقولوا الصورة الكبري للنصيب كذبة زايفة
من إختراع عقول من عشوائية الدنيا خايفة
زمان أنا كمان غرقت في الحجج وفي الردود
فاكر إن ده المفروض، عشان يصح نكون شهود
لكنه كان طريق مسدود
خلاف دايما موجود
لإن مفيش دليل خلى رأي يسود ورأي يموت
بس ده "الإيمان" فاهم ؟!
إن العالم محدود
كان هيبقي علم مش إيمان لو قابل للثبوت
بس ليه اتخيلنا المالا نهاية والعالم معدود ؟
وليه بنموت ياكلنا الدود ، وظهرت فكرة الخلود ؟
وليه بنحس إن السما بتتكلم ؟
وناس مشيت من زمان بتبتسم وتسلم ؟
مين إللي بيقوينا أما بنتألم ؟
النور مش في المخ في القلوب مهما نتعلم
تصالح مع ذاتك
انت مش متأخر مهما فاتك
تسامح مع ذاتك
حتى لو اختياراتك سبب معاناتك

شكرا لناس رجعولنا الثقة بعد ناس نقم
كانت علاقات مرهقة ، نفسيا محرقة
علاقات مربكة بدون ماتكون حتى مدركة
بتدمر بالفطرة زي ثور بيجري في الأروقة
شكرا ع العلامات إللي أرشدت كل شخص حاد
عن الطريق وكاد يتوه؛ لكن شافها ورجع وفاد
زي ما استفاد، فهم بشكل بات إن إحنا مش آحاد
مش حيوانات ولا في حياة بعض stepات
شكرا لناس بساط
بدون تكلم واستطراد
في قلوبهم إيمان فاض
فشال من ع العينين رباط
بدون تكلف واستعراض
ولا مزايدة ولا أمراض
ولا كان ليهم أي أغراض
نفوس بيضا وشعت بياض
شكرا علي ثباتك في أسوأ حالاتك
وعلي عدم مغالاتك في مطاردة ملذاتك
شكرا علي جهادك في سبيل تحسين عاداتك
شكرا علي إن حياتك مش علي حساب إخواتك ..
تصالح مع ذاتك
انت مش متأخر مهما فاتك
تسامح مع ذاتك
حتى لو اختياراتك سبب معاناتك
----------------------------
Follow El Joker on:
Facebook:   / eljokermusic  
Twitter:   / eljokermusic  
Instagram:   / eljoker_music  

‎#الجوكر
‎#ذاتك