Жалғас Алагозов (1954-2012) - Қалнияз ақын мен Кете Тәжібайдың айтысы

ҚАЛНИЯЗ АҚЫННЫҢ КЕТЕ ТӘЖІБАЙМЕН АЙТЫСЫ

Ертеде Кіші Жүз елінің үлкен бір жиынында Әлім елінен бас айтысқа Кете Тәжібай ақын
шығатын болып белгіленіпті. Хабарды естіген Байұлы жағының ақсақалдары өзара
ақылдасып «Біз мұны әуелі Адайларға білдірейік, айтысқа көңілді айтқыш ақындары
болса Әлімге солар шығарсын. Егер оларға айтпай біз өз жағымыздан біреуді шығарып, ол
Тәжібайды жеңе қойса жақсы, егер жеңіліп қалса Байұлыға сынықтық келтірдіңдер» деп
Адайлар бізге күн көрсетпес. Жеңсе де, жеңілсе де солардан шықсын: егер олар айтысар
ақын таппаса, басқа Байұлының бірінен болмаса бірінен ақын іздеп табармыз» деп
шешіпті де, Адайларға хабар жіберіпті.
Сол тұста Тіней Өгізбай жырау бар екен, Адайлар соған барыпты. Сонда Өгізбай отырып:
«Мен үлкейдім, ауызымның қиыны қашты. Сіздер Қалниязға барыңдар. Айтысқа
біріншіден – қарсы жақтың айтқан сөздерін ұмытпай, ұғып алғандай бабырлылық керек,
екіншіден айтар сөзіңді жасқанбай батыл айтуға ерлік те керек. Сол екі қасиет те
Қалниязда бар» – деп келгендерге ақыл-кеңес беріпті. Сонымен Адайлар қос атпен Сам
өресінде жүрген Қалниязды алдырып, өтетін жиынға алып барыпты. Қалнияздың қасына
ерген адамдардың ішінде Қосқұлақ Көтібар батыр да бар екен.
Әуелгі сөзді «аға баласы» деп Тәжібайға беріпті.