Jaya Perbangsa Karna Gugur (Pangalengan, 2010) - Yogaswara & H. Asep Sunandar Sunarya

Pagelaran wayang golék Giriharja 3 pingpinan Ki Dalang H. Asep Sunandar Sunarya ieu mangrupakeun pagelaran live di Lapangan Pasirmulya Desa Margamulya Kec. Pangelengan Kab. Bandung, 2010. Dina pagelaran ieu dibagi dua babak. Nu kahiji nyandak lalakon Jaya Perbangsa atanapi Gatotkaca Gugur. Dalangna ki dalang anom Yogaswara Sunandar Sunarya. Babak kadua nyandak lalakon Karna Tanding atawa Karna Gugur, dalangna nyaéta H. Asép Sunandar Sunarya. Mung hapunten ngamérana pengkereun dalang.

=================================

Sinopsis
Sanajan tos apal yén Gatotkaca bakal gugur di Tegal Kurusétra, rupina lalakon ieu kanggo sim kuring mah lalakon nu pangsedihna. Teu sasedih waktu Abimanyu gugur. Dina carios mimiti ki dalang anom Yogaswara nyaritakeun kondisi di Tegal Kurusétra, tempatna peperangan antara Pandawa jeung Kurawa nu disebut Baratayuda. Batara Kresna rerencepan mawa Gatotkaca ka tempat anu suni. Intina Batara Kresna méré piwejang ka Gatotkaca nu bakal jadi senopati agung atawa panglima perang. Batara Kresna geus apaleun yén Gatotkaca bakal perlaya di médan perang ngalawan Adipati Karna nu boga senjata Konta.

Dina babak kadua, lalakon Karna Tanding atawa Karna Gugur. Lalakon ieu ngagambarkeun perang pangsengitna dina Baratayuda. Adu kasaktian antara Adipati Karna ti pihak Kurawa ngalawan Adipati Arjuna di pihak Pandawa. Dua dulur saindung béda bapa.

Saméméh lumangsung perang, Déwi Kunti nepungan anakna Adipati Karna di sisi walungan Yamuna nu keur ngalamun mikiran nasib dirina. Déwi Kunti miharep Karna ngabatalkeun niatna jadi panglima perang nu bakal ngalawan adina nyaéta Arjuna. Paménta indungna teu ditedunan kusabab salaku sinatria teu bisa kitu waé ngabatalkeun paniatan nu geus diumumkeun. Salian ti éta, manéhna ngarasa kahutangan budi ka urang Kurawa nu geus ngangkat harkat martabat nu asalna kusir kuda jadi bangsa sinatria. Malah mah Karna nganaha-naha ka Déwi Kunti kunaon baheula manéhna dipalidkeun ka walungan waktu gubrag ka alam dunya.

Carios lengkepna mangga bandungan dugi ka réngsé. Mudah-mudahan pintonan wayang golék ieu janten pieunteungeun ka urang sadayana, teu sakadar hiburan tapi malah mandar tongtonan jadi tungtunan, gogonjakan ulah jadi éjékan anggursi jadi ajakan demi kokohna persatuan jeung kesatuan bangsa.

Teu hilap ka nu teu acan subscribe channel pribados nu énggal ieu mangga subscribe sareng pencét loncéngna supados uninga pami aya aplodan énggal. Salajengna urang sadayana kintun du’a ka almarhum Pa H. Asep Sunandar Sunarya sareng para nayaga Giriharja 3 nu parantos ngarantukeun, mugia sadaya almarhum ditampi iman islamna, dihapunten dosa-dosana, dicaangkeun di alam kuburna, dipaparinan tempat anu mulya mungguhing Allah Swt,. Aamiin Ya Robbal Alamin. Wassalamualaikum Wr. Wb.