الزربيان بطريقة سهلة ولا أروع

خطة الزربيان المفتخرة
المقادير:
دجاجة مقطعة أرباع
كاستين رز مزة بسمتي مغسول ومنقوع لمدة نص ساعة
البهارات الصحيحة:
ورقتين غار / ملعقة صغيرة فلفل أسود / عود قرفة / ٥ حبات قرنفل
البهارات المطحونة: ملعقة صغيرة من :
كركم / فلفل أسود / كمون
/ كزبرة
نص ملعقة صغيرة هيل / رشة ملح ليمون / ملح عادي
منقوع الزعفران
٣ فصوص ثوم
٢ بطاطس مقطعة أرباع
علبة ونص لبن زبادي
٤ حبات بصل مقطع جوانح
الطريقة:
نقلي البصل مع زيت غزير ولابد من تقطيع البصل بشكل متساوي ويتقلب باستمرار ، لما يتحمر البصل نرفعه من الزيت ونحطه في صفايه عشان يتصفى من الزيت
نجيب قدر وناخذ شوية من زيت البصل ونضيفه في القدر ونحط قطع الدجاج على الوجه لين يتحمر شوية ونعمل تتبيلة الدجاج نحط في الخلاط اللبن الزبادي والبهارات المطحونة والثوم ونص كمية البصل المقلي ونخلطهم ونضيفهم على الدجاج نحط شوية موية في الخلاط ونضيف باقي التتبيلة نضيف البطاطس ونقلبه ونغطيه لمدة ساعة إلا ربع لين يستوي تلاتة أرباع استوى
نسلق الرز في قدر لوحده مع الموية المغلية والبهارات الصحيحة والملح أول ماتبدأ تغلي الموية نحسب ٥ إلى ٧ دقايق لين الرز يسير نص استوى ونصفيه من الموية تماماً نجيب قدر ونحط فيه طبقة رز ونضيف رشة بصل مقلي وزيت البصل ونضيف خلطة الدجاج والبطاطس وطبقة ثانية من طبقة الرز ونوزعه نحط فوق الرز زيت البصل ومنقوع الزعفران ونقفل القدر لمدة نص ساعة على نار هادية ( شمعة )
بعد مرور نص ساعة نرفع طبقة الزعفران ونحطها في صحن لوحده ونغرف الرز ونحط فوقه طبقة الزعفران والبصل المقلي ورشة كزبرة و نقدمه مع سلطة الدُقس
سلطة الدُقس:
طماطم : ثوم /كزبرة / فلفل حار / عصرة ليمون / ورشة ملح ونعصرها عصر بسيط عشان تطلع النكهة مزبوطة

وبالعافية وادعولي معاكم