شيلة : عزيز نفس | شعر : خالد الوقيت | اداء : نايف راضي

عدّيت في هضب الانعـم من جهة رامه
والشمس تكحل عيوني بـ مِيل مشرقـها
حـاديني شيٍّ بـ قلبي .. شايط اضـرامه
جمع ضلوعي بـ جنح الليل .. واحـرقها
قلت اتلـقّى ... براد الصبح ... وانسـامه
وافكّ ازاريـر صدري ... لـ اجل يطـرقها
يا رجل ... ما انتي على المرقاب ملّامه
لا فـزّع العين ........... كابـوس ٍ يارّقها
مواجــع العمر ... في خدّ الشـقي شامه
مـهـمـا تصــدّد بـ وجـهـه ... ما يفــارقها
واقـدار الانسان ... تشبـه بصمـة ابهامه
ياتي على لـحـظـة المـيعـاد .. طــارقـها
لكن لطايف  ... فضل مولاه ... وانعامه
تحيي حدايق  ... أمـانــيـّـه ... وتورقها
اذا ظمي بـ الحياة ...... وتاهت اقدامه
يروى من غيومها .... ويسري فـ بارقها
يارب خالد ....... ويومـه يشبه لـ عامه
جمّل لياليه ....عن ماضيـه .. وافرقـها
واسعـد قـلوبٍ ... تأوّه عنـه بـ اسقـامه
حـنانـها .. وطيبها ..  بالناس .. فارقـها
وانا احب الوفي .... واسعـى لـ اكرامه
ما ابيّت النـاس .. بـ الشينه ولا ادرقـها
عزيز نفس ٍ ......... يدوّر رفـعة الهامه
يعشق سموّ السما ..... ويهيم بـ ازرقها
طرد الجوازي .. شمالي اقرم .. اهيامه
اللي خذت اجمل الاوصاف .. واعرقها
خنسا نواظر ... اسيلة خـد ... سلهامه
ترعى سدر فيضة المارَد  ... وعِشرقها
شاعر.. يروم الجزيل ... بـ جرّة اقلامه
لاا لقى دواته على الاوراق ... واهرقها
عايش مع جروح ... ماهي قط ملتامه
يخطف من انيابها الفرحه ... ويسرقها
يزرع بـ ترب التفـاؤل ... بذرة احـلامه
كل ما ظمت علّـها - بـ الدمع - واغرقها

خالد الوقيت