تاجر بعملة ربنا | سامح حسين

رمضان 2025
#قطايف
ٍتاجر بعملة ربنا
تعرف عنترة بن شداد طبعا ، اللي هو الفنان فريد شوقي ، عنترة لما حب يتقدم لعبلة أبوها قاله لازم تروح بلاد الملك النعمان تجيبلي ١٠٠٠ ناقة حمرا وربع جبنة تركي ( أيوه ابوها كان اسكندراني )
عنترة راح وحاول يعمل النمرة بتاعته هناك ، بس رجالة الملك النعمان اتكاتروا عليه وعكشوه ، والملك قاله هديك اللي انت عايزه بس بشرط ، تشتغل معايه كام سنة كدا وتساعدني في حروبي وحواراتي على القبايل التانية .
عنترة وافق ، واشتغل معاه كام سنة وبعدين قرر ينهي إقامته وياخد القرشين بتوعه ويرجع بني عبس عشان يتجوز بلبلة ( هو كان بيدلعها كدا )
المهم يا سيدي ، الملك النعمان قاله انا مش هديك ألف ناقة عشان هيكلفوك في الجمارك ، أنا هديك حقك ناشف ، بوكيت موني يعني ، وليك يا عم عنترة في ذمتي ١٠٠ ألف ، بس محددش ١٠٠ ألف إيه ، دينار وللا درهم وللا ين ياباني .
عنترة قاله ١٠٠ ألف إيه يا مولاي لا مؤاخذة عشان نقفل الشيك ، الملك قاله لأ ياعنترة ، دا الواجب بتاع عمك النعمان بقى ، انا هسيبك انت تختار العملة اللي عايز تاخد أجرك بيها ، وأي عملة هتختارها هديك منها ١٠٠ ألف .
عنترة طبعا كان ناوي يشغل فلوسه في بني عبس ، واللي هنفترض ان عملتها كان اسمها سنكوح .
بدأ يقارن كل العملات اللي في السوق بالنسبة للسنكوح العبسي تعمل كام .
لقى عملة ب٥٠ سنكوح ، وعملة بـ ٣٠٠ سنكوح ، وعملة بألف سنكوح .
لو انت مكان عنترة ، تختار تاخد مكافأتك بأنهي عملة ؟
هو دا سؤال الحلقة .
أي حد عاقل عايز يستثمر ، وعنده فرصة يختار العملة اللي هيشتغل بيها ، طبيعي يختار أغلى عملة ، وأكتر عملة استقرارا . عشان يضمن انه هيكسب ومش هيخسر .
طيب انت تعرف ان الدنيا بتاعتنا دي فيها ٣ عملات بس .
الظلم والعدل والفضل ، والأخيرة دي هي العملة الخاصة والحصرية للبنك المركزي الإلهي ، عملة ربنا بس .. وهشرحلك دلوقتي الكلام دا يعني إيه .
لو انا استلفت منك ٤ جنيه - انا مش عارف إيه الظروف اللي ممكن تحوجني لحد في المبلغ دا بصراحه ؟! - بس نفترض ، لو رجّعتلك بعد كدا ال٤ جنيه دول زي ما هم ؟ دا اسمه عدل لأنك خدت حقك كامل ، طيب رجّعتلك ٢ جنيه وضربت على ٢ جنيه ؟ دا ظلم ، لأني كلت جزء من حقك ، لكن لو انت بسماحة نفس قولتلي مش عايز منك حاجة ياموحة ، وخلي فلوسك في جيبك ؟؟ دا بقى الفضل . – ياريتنى كنت طلبت 8 جنيه - .
وال٣ عملات دول مش في المعاملات المادية بس لأ في كل تعاملات حياتنا .
لو انا قولتلك كلمة زعلتك ، انت من حقك تردهالي كلمة زيها ، دا العدل ، وممكن متقدرش تردها ضعفا منك مثلاً فيبقى دا ظلم ، وممكن تعفو وتصفَح ، ودا الفضل .
عايز اقولك ان كل المؤسسات القانونية وكل أنظمة العالم بتسعى لتحقيق العدل ، القوانين أصلا اتحطت عشان تحافظ على العدل ، بين الزوج والزوجة ، بين الموظف والمدير ، بين البايع والشاري ( مش يفتح الله ) لأ ، دي حاجة تانية .
لكن مفيش منظمة في العالم تبنت فكرة التعامل بالفضل ، مع انه أحسن بكتير ، وطبيعي يكون أحسن لإنه عملة ربنا اللي بيتعامل بيها مع عباده .
أيوه أومال انت فاكر ان ربنا بيعاملنا بالعدل ؟؟!! انت عارف لو ربنا عاملنا بعدله هيحصل فينا إيه ؟ هنضيع .
ببساطة شديدة انت في أحسن الأحوال عبدت ربنا ٦٠ سنة ، تدخل الجنة ٦٠ سنة وشكرا ، مالكش حاجة تاني ، لكن انت ممكن ربنا يحسن ختامك ، وتمشي عدل بس آخر أسبوع في حياتك ، تدخل الجنة وتعيش فيها إلى ما لا نهاية ، دا اسمه فضل ربنا عليك ، وكدا كدا محدش هيدخل الجنة بعمله .. كلنا هندخل ان شاء الله برحمة ربنا .
ربنا بيدهشنا بفضله وكرمه وهو بيتعامل معانا ، يقولك الحسنة بعشرة ويضاعف لمن يشاء ، بس السيئة بسيئة واحدة ، دا فضل .
يقولك لو عملت حسنة تتكتب حالا ، ولو عملت سيئة يديك فرصة تتراجع عنها قبل ما يكتبها ، لو اتراجعت تتكتبلك بدالها حسنة ، ما هو دا فضل .
يقولك لو فكرت في حسنة ومعملتهاش يكتبهالك ، لكن لو فكرت في سيئة ومعملتهاش يكتبلك حسنة ، ما هو دا ياحبيبي فضل .. يبقى متقوليش ان ربنا بيتعامل معاك بالعدل .
وعلشان ربنا عارف ان عملة الفضل دي عملة صعبة علينا ، مفرضهاش بشكل رسمي ، بس فكرنا بيها بلطف ، وقالنا ﴿ وَلَا تَنسَوُا الْفَضْلَ بَيْنَكُمْ ﴾ يعني خليها في دماغك . لما تقدر تتعامل بيها يكون أحسن .
الأساس في أي شيء هو العدل ، ودا محدش هيلومك عليه ، بس الأحسن ليك وللناس انك تتعامل بالفضل
يعني مراتك مزعلاك ، من حقك تستنى لما هي تيجي تصالحك - وابقى قابلني لو دا حصل - بس برضو ميمنعش انك تخليها عليك شوية وتروح انت تصالحها ، دا مش هيقل منك والله بالعكس هايكبرك .
لو ليك حق عند حد - دين مثلا - من حقك تسجنه لو مسددش ، محدش هيقولك بتعمل كدا ليه ، بس تقدر - لو شايف ظروفه مزنقة وانت مش محتاج حقك أوي يعني - أنك تتنازل لوجه الله .
صاحبك الأنتيم آخر كام مكالمة بينكم انت اللي كنت متصل بيه ، وهو مبيتصلش بقاله فترة ، تقدر تستنى لما هو يكلمك ، وتقدر تبدأ المرادي كمان وتكلمه ، ودا اسمه الفضل .. وتطبيقاته في الحياة كتيرة أوي مش هنقدر نعدها كلها .
بس اللي عايزك تفهمه ان الحياه صعبه على الكل وهاتبقى أسهل وأجمل بكتير أوى لو كلنا أتعاملنا مع بعض بالفضل .
صدقنى من مصلحتك وانت بتستثمر في الحياة انك تشتغل بأغلى عملة واكتر عملة سوقها مستقر والتجارة فيها مربحة ، عملة ربنا .. الفضل .
وكل سنة وانتم طيبين .