موسوعة امراض أسماك الزينة - مرض النقاط البيضاء

ازيكم عاملين ايه اسألة كتير بتجيلي عن امراض الاسماك و لأن الاسماك تعتبر من الكائنات الي صعب تحدد الامراض فيها فهعمل سلسة أمراض الاسماك و علاجها و النهرده هنتكلم عن أكتر مرض شائع بين الاسماك و هو مرض النقط البيضاء او الوايت سبوت و قبل ما نبدأ الحلقة متنساش تعمل سب سكرايب للقناة و دوس لايك و يلا نبتدي الحلقة انا اسامة و دا سمك في ميه

قبل ما نتكلم عن مرض النقط البيضاء حابب اقلكم ان لازم تقعد قدام الحوض بتاعك يوميا و تراقيب كل حاجة فيه و تبص علي اسماكك كويس لأن الامراض ممكن لسة في بدايتها و في اعراض بسيطة ابتدت تظهر علي سمكتك و كل ما ابتديت تعالج المرض في مرحلة مبكرة كل ما قدرت تنقذ أسماكك من تفشي المرض في الحوض كله و تنفذ الروح الي انت بقيت مسؤل عنها من وقت ما قررت انك تربيها

دلوقت ايه هو مرض النقط البيضاء ؟
مرض النقط البيضاء يعتبر من الامراض الطفيليه الي بتنتشر في كل جسم السمكة بتلاقي السمكة ابتدي يظهر علي جسمها كله او اجزاء منه نقط بيضة ممكن يكون حجمها صغير جدا جدا عامل زي البودرة او حبات كبيرة الحجم قد حبة السكر و المرض دا بيكون منتشر في كل الميه بتاعة الحوض و لو متعالجش بدري هينتشر في كل جسم السمكة و هياكل في جسمها حرفيا لحد ما تموت و المرض دا بيصيب كل أنواع الاسماك سواء أسماك الميه العذبة او المالح
طيب المرض دا ازاي بيجي للأسماك عندي ؟
أول سبب لمرض النقط البيضاء هو بيكون عن طريق نقل سمكة مصابة بالمرض من حوض مصاب لحوض سليم او مياة من حوض مصاب للحوض السليم علشان كده بنأكد علي انك لما تشتري اي سمكة جديده لازم تبص كويس علي الحوض الي بتشتري منه ميكونش فيه اي اصابة او ارهاق للسمكة و تكون الوانها زاهية و بتعوم كويس في الحوض ثانيا عزل اي اسماك جديد في حوض منفصل لمدة 48 ساعة علشان تتاكد من خلوها من اي امراض طفيليه كمان لما تنقل السمكة من الكيس للحوض متضيفش الميه الي جاي بيها السمك للحوض عندك لأنها ممكن تكون حاملة لأي امراض
طيب انا مجبتش سمك جديد ولا نقلت ميه من حوض تاني و المرض جه للأسماك عندي ايه السبب؟
هقلك ان المرض دا يعتبر زي دور البرد كده الي بيجيلنا بس للأسماك و بيكون بسبب ان درجة الحرارة في الحوض عندك ما بين 24 و 27 و دي درجة حرارة مناسبة جدا لنمو و تكاثر المرض دا و بدون دخول في تفاصيل كتير عن مراحل تطور الطفيل بس بيظهر في الحوض بعد مرور 48 ساعة من وجوده في الميه و ايجاده للعائل الي هو جسم السمكة و بيبتدي يتكاثر و ينمو و ياكل في جسم السمكة و يتذي عليه
طيب هل في اي اعراض تاني بتظهر علي السمكة قبل ما يظهر عليها المرض بشكل واضح ؟
ايوه بتلاقي السمكة بتحاول تحك جسمها في الديكورات بتاعة الحوض او في الجرش او حتي بتلف حولين نفسها او حركتها سريعة جدا لأنها حاسة بأنها عايزة تعرش و الطفيل بياكل في جسمها
طيب دلوقت بعد ما عرفت الاعراض و الاسباب إزاي اقدر اتعمل مع المرض دا ؟
اول حاجة لما تشوف النقط البيضة انك تبتدي ترفع درجة حراره الحوض عندك درجتين في الساعة لحد ما توصل ل 30 درجة مئوية
ليه علشان الطفيل في درجة حرارة 30 بتبقي دورة حياته اسرع و بيموت و البكتريا الي في الميه مبتتحملش الحرارة دي و تموت و كده تبقي قضيت علي جزء كبير من الطفيل
اتأكد ان الحوض عندك متوفر ليه كميه هواء مناسبة زود الهواء في الحوض علشان الأسماك في درجة الحرارة العالية بتحتاج قدر اكبر من الاكسوجين
هنستعمل علاج خاص بالنقط البيضاء زي دواء النقط البيضاء بتاع نايل تانك و دا بنستعمل جرعة 10 مم لكل 100 لتر من ميه الحوض و يفضل طبعا علاج الاسماك بنفس الحوض بدون عزل علشان نعالج الطفيل من الحوض كله
كمان متنساش تقفل الفلتر علشان ميسحبش العلاج هنكرر الجرعة دي في الحوض لمدة 10 ايام مع تغيير المياة الدوري ربع الحوض كل يومين لحد ما هتلاقي ان شاء الله المرض اختفي من الحوض عندك
ممكن كمان تستعمل الملح البحري او الخشن الخالي من اليود و ممكن عمل حمام ملح للأسماك يعني هتجيب حوض صغير 20 سم مثلا و تحط عليه معلقة ملح صغيره و تدوبها في الحوض و تغطس السمكة بتاعتك فيه لمدة 10 دقائق او ربع ساعة و بعد كده ترجعها الحوض تاني
بس كده اتمني تكون الحلقة عجبتكم و بتمني دايما الصحة و السلامة لكل أسماكم و متنسوش تعملوا 3 حاجات لايك شير سب سكرايب و تفعلوا زي الجرس علشان يوصلكم كل جديد
انا اسامة و دا سمك في ميه سلام

متنسوش تتابعوانا علي صفحة الفيس بوك
  / samakxmaya  
وتعملوا فلو لينا في الانيستجرام
  / samakxmaya  
و شير لكل أصدقائكم لتصل المعلومة للجميع