باچر مو بعيده أنشوف أنشوده | رسالة2 | الشاعر سيد عقيل الشريفي الطويرجاوي 1447هـ

رسالة مهمة جداً الى البعض
....
باچر مو بعيده أنشوف أنشوده
بسم حسين بس الغيره مقصوده
_______
الشاعر : الشاعر سيد عقيل الشريفي الطويرجاوي

مونتاج وأخراج : خادم الآل
::::
القصيدة كاملة
باچر مو بعيده نشوف إنشوده
بسم حسين بس الغيره مقصوده

مثالاً خلي نضرب سالفة بگعده
شاعر أو ملحن يكتب العنده
يحب بالديره واحد أو يحب وحده
ويجي دور المؤدي ويقره مولوده

ومن يقره المؤدي وتسمع ألحانه
إذا عاقل تفرزن يقره لفلانه
وتصير القصيدة النوب عنوانه
ونغمة هاتف بجوال شمهوده

وإذا ما راد شهره بهذا تكليفه
على الأحوط وجوباً مَبدأه يعيفه
ماكو خطوط حمره ويلعب بكيفه
اليريد الطشه لازم يعبر حدوده

لأن هسه اليخالف يكتسب ميزه
ويصرفوله جواز ودفتر وفيزه
شيفيد الثگل ميوكل خبيزه
الخفيف اليوم علَّگ ربعه موجوده

وكت دعدوعه هذا أو وكت سعلوسه
الرزن ياهو اليگلب خده ويبوسه
البشر مقياسه صار بكثرة فلوسه
وإذا ما عنده يعني أيامه معدوده

الماعنده دخل كل شغله متلاشي
ولا مرغوب أصلاً سوگه ما ماشي
زِلَگ وأخذوا مكانه اللوگي والواشي
وبعد ياهو اليقيم بلَّه مجهوده

والماله أخو وميتات خالاته
حديده بلا ربد شتفيد مسحاته
تلوچ الدنيه روحه وتنهش بذاته
إذا ما تلگه قوه بظهرة مسنوده

وإذا شفنه رئيس اللجنة أبو عطيوه
گول العورة صارت كلش حليوه
ويجل الله السامع تصبح الگيوه
بحكم إگطيو مثل التاج محموده

وإذا يحچي المثقف وإنتقد طرحه
دكتاتوري يطلع مثل إبن صبحه
يلومه المُستفيد ويعترض شرحه
ورغم سالفته بيضه يگله لا سوده

صفت للحلگه فاهي الناس منصاعه
والمبدع تكتر عاف إبداعه
بعد إلمن يسولف هيَّ طرگاعه
عليه طاحت وإذان الناس مسدوده

ليش البي حرورة عله السبط كلش
تشوف إبظهره چف البارد يفلش
يم إبن الحرام من الصبح يغبش
ويم إبن الحلال يريد اليگوده

غير الفكره ناصع يُحتَرم رايه
مو يلگله اليصير بدربه سلايه
الله الساتر من أيامنه الجايه
ما ندري عله يا منهاج ممدوده

أخاف نشوف أتعس مرحلة النوبه
ويجيك هدان يلعب بالشعر طوبه
وأطوار القصيده بلحنه مگلوبه
غناء ومن تنشده يگول مريوده

يا مريوده وإنتَ براسك محشه
سوالف تغضب الله ويقشعر عرشه
جنابك مستغل حسين للطشه
وهوَّ عليك حتى ضلوعه ممروده


#خادم_الآل