ИИМ: Өлкөдө баңгизаттарды мыйзамсыз жүгүртүүгө каршы аёсуз күрөш жүрүүдө

Учурда Ички иштер министрлиги тарабынан өлкөдө баңгизаттарды мыйзамсыз жүгүртүүгө, анын ичинде көйгөйлүү маселелердин бири болуп жаткан Интернет аркылуу синтетикалык баңгизаттардын таркалышына жана дарыкана баңгилигине каршы аёсуз күрөш жүрүүдө. Бул багыттарда ички иштер органдары алдын алуу, бөгөт коюу боюнча коюлган тапшырмаларды тынымсыз аткарышууда.
Кыргыз Республикасынын ички иштер органдары тарабынан баңгизаттарды мыйзамсыз жүгүртүүгө каршы күрөшүүнүн натыйжасында, алты ай ичинде 677 кылмыш аныкталып, мыйзамсыз жүгүртүүдөн 12 тонна 835 килограмм 62 грамм баңги каражаттары, психотроптук заттар жана прекурсорлор алынган. Белгилей кетсек, былтыркыга салыштырмалуу 7 тонна 634 килограмм 147 граммга көп. Алардын ичинде героин, психотроптук заттар, каннабистин чайыры (гашиш), -марихуана, прекурсорлор жана башкалар.
Андан сырткары, 7 жашыруун баңгилаборатория жоюлуп, 58 кылмыштуу топтун ишине бөгөт коюлуп, баңги кылмыштары үчүн издөөдө жүргөн 10 адам кармалды.
Интернет мейкендигинде, анын ичинде Darknet, ошондой эле “Vipole”, “Telegram”, ж.б. мессенджерлер аркылуу баңгизат каражаттарды жана психотроптук заттарды сатуу менен алектенүүчү тараптарга мониторинг жүргүзүүнүн натыйжасында, 120 баңги кылмыштары катталып, мыйзамсыз жүгүртүүдөн 9кг 799гр баңгизаттар алынган.
Ошондой эле, баңгизаттарды таратуу менен алектенген 24 интернет-дүкөн аныкталып, анын ичинен үчөө жок кылынып, 4 уюштуруучусу кармалган.
Жылдын башынан бери баңгизаттар менен байланышкан кылмыштарды жасагандыгы үчүн чет элдик 10 жаран кармалган, алардан мыйзамсыз жүгүртүүдөн 1т 514кг 360гр ар түрдүү баңгизаттар алынган.
Кошумчалай кетсек, Ички иштер министрлиги тарабынан жаштардын баңгизаттарга азгырылуусун алдын алуу боюнча күчөтүлгөн иштер жүрүүдө.

ИИМдин Басма сөз кызматы