Ali Aktaş - Bılbıle Dılşad {Gotin : Seydayê Tîrêj, Awaz : Yûsif Berazî ( Bêbuhar)

Ali Aktaş - Bılbıle Dılşad - Jı Medresa Heta İro Muzika Kurdi.

Ey bilbilê dilşadî hela wer bike fîxan
Derdê me girane ey bira, birîna me kûr e
Gorî te bitin cerg û dil û mêlak ê hem can
Dengê te ye xweştir, ji ney û nay û bilûrê..

Sê hawe tê deng, yek ji sira bayê siba ye
Hawayê dî ji dengê xuşîna dehl û reza ye
Hawê sisîya ji bihna şemamok û gula ye
Lewra ku li dinê tu bi nav û tu meşûr e..

Karwanê me va bi rê ketî, lê şevreş û tarî
Serma ye terez kulyên di berfê her dibarî
Bahoz e çelapek têne me, ji her çar kenarî
Warê me welat e ey heval, rêça me dûr e..

Çar hawîr me diz û keleş in, têk dane dijmin
Me ji hev radiqetînin bir bi bir, heyf û mixa bin
Qet çare û umîda me nema ye bilbilê min
Meydan e ji bo hirç û çeqel, gur zûre zûr e..

Meydane ji bo hirç û çeqel, rovî û keftar
Gorî te bim bilbil, ji serê darê tu wer xwar
Da pêk ve mijûl bim, bi xwe çend rojên di dijwar
Îro li me ferman e, li ser gerdenê şûr e..

Destê tewqeyê îro ku em herdu bidin hev
Çend sal û zemanên di xerab jîn em di gel hev
Dinya bi xwe dewran e, bizan geh roj e, geh şev
Geh tarî û dûman e û geh rewşen û nûr e..

Dîna xwe bide nik bayê barîn ey birader
Sitêra sibê îro ji şerqê li me da der
Rewşen bîri Kurdistan, bi carek wê seranser
Nîşana sibê ye, fereca xêrê ne dûr e..

Piştê wê sitêrê bi xwe berbanga sibê ye
Wê roj hilê rohnî têkeve şûna şevê ye
Karwanê me wê bighêje war û meqsedê ye
Çerxa felekê herdem bi fetl û ger û dewr e..

Çerxa felekê herdem bi fetl û ger û dewran
Hêvî û hawara me ji Yezdanê dilovan
Qet Çare ü Umida me jı serdarê li Berzan
Wek Tîrêj dibêje: jîn divê kotek û zor e..
. . . . . . . (Seydayê Tîrêj) . . . . . . . . . . . .